【逆權運動】遭《大公》揶揄扮「睇直播」 失明律師斥歧視:好無知!

更新時間 (HKT): 2019.09.18 00:01
(資料圖片)

失明人士站在前線保護示威者,卻惹來左派報章嘲諷。一名失明律師早前響應九龍灣德福廣場「行街」活動,表示因「睇直播」知悉有關活動,故前往參與。《大公報》早前刊登一篇專欄文章,揶揄該失明律師如何「睇直播」,「真係信佢半成,都雙目失明」。涉事失明律師批評《大公報》歧視中傷,貶低盲人的能力,「係好無知」。

記者 王家文

本月7日有網民發起「全民黨鐵商場Window Shopping齋睇唔買行動」,失明律師陸小姐當日前往德福廣場「行街」,其間有途人扶着她前行。當日她接受《蘋果》訪問稱,剛從機場出來,因不能接受警方的暴行,希望向示威者講解法律知識,「睇你哋《蘋果》直播,就知道呢度有直播,咪嚟呢度囉」。被問到為何知悉是《蘋果》直播,她表示,「因為認得你(記者)把聲」。

《大公報》則於9月9日刊登一篇題為「爛蘋果視頻當人雙目失明」的專欄文章,由署名「鄭晴」撰文。文中指,當日《蘋果》記者在現場採訪一名手持「枴杖」、戴着耳機的集會參與者,「這位聲稱『本人係律師』的受訪女士強調雙眼失明,但近來經常出現在各類集會前線」,又指該失明女士「表明是蘋果的fans,仲經常睇直播」。

作者更在文中質疑,「鄭晴當場O曬嘴,佢明明話雙目失明,又話『睇直播』?恕鄭晴學識淺薄,唔明佢想玩邊科,真係信佢半成,都雙目失明!」有關文章刊登後,在盲人圈子廣傳,認為是歧視中傷。

「我是一個真失明律師!」遭中傷的陸小姐於周日(15日)獨自前往《大公報》位於灣仔的辦事處外張貼及宣讀抗議聲明,批評《大公報》捏造新聞,應作反省。她接受《蘋果》訪問時指,盲人以日常用語溝通,如「睇戲」、「睇書」等,屬正常不過,而她所指的「睇直播」,其實依靠耳機去聽,「對盲人係完全誤解」。

陸小姐強調,盲人看不見,全賴聲音辨識,可以分辨得很清晰,故認得《蘋果》記者的聲音,「根本唔出奇,唔好再屈」。她又指,文章指她當日「手持拐杖」,同樣反映作者的無知,因那是盲人專用的白杖。她批評,該文章帶有極度歧視性,貶低盲人的能力,強調盲人一樣可以站在前線示威,「做番香港人應該要做嘅事」。

香港失明人協進會會長莊陳有也在其個人facebook發文,指盲人生活在以視覺為主流的社會,自然也會用主流語言如「睇直播」、「睇波」、「睇醫生」等,「唔通遇到盲人就要話聽電影對白同音效,聽醫生診斷?又唔通視障人士「相睇」都要用一個專有名詞?」正如他是盲人,「但我也會講再見,很小講再會」。莊陳有指,認識陸小姐多年,對方是香港首位取得專業執業資格的失明律師,「她的勇氣與服務精神,是值得我們香港人驕傲的」。

一格照片,一個故事,Follow蘋果Instagram!
BannerBanner