【李八方online】Black Bloc裝束有意思?唐英年全黑上京「賀」建政

更新時間 (HKT): 2019.09.30 13:18
張志華攝

中共建政70周年紀念日前夕,大批親北京人士先後現身香港國際機場,準備坐專機上京面聖贈慶,但當中竟然夾雜一個「黑衣人」,無論件恤衫定西裝都係黑色,呢個人就係全國政協常委唐英年。唐唐呢身全黑裝扮,惹來唔少網民議論紛紛,有人讚佢著得「好合時宜」,有人笑佢係示威者嘅「black bloc」,亦有人話佢政治不正確,叫佢應該著到紅噹噹利是封上京先啱。

同政府及警方未審先判,開口埋口鬧示威者係「暴徒」唔同,唐唐今日回應傳媒提問批評個別示威者時,最多都係用「少數暴力示威者」呢個稱呼,佢又話過去幾個月,自己最傷心係見到唔同政見人士互相毆打,無咗過去互相包容嘅尊重,希望大家諗一諗,乜嘢係香港嘅核心價值。有網民就不禁想問一句:「接受唔到立場唔同,亂打人,你係咪講緊我哋嘅香港警察?」

表明上京期間有機會同中央官員見面嘅唐唐,臨上機前亦不忘暗批林鄭,直指特區政府呢幾個月來嘅表現係「有所不足」,尤其係制定《逃犯條例》過程中,不論政治評估或者諮詢過程都係做得不足,結果令香港社會去到呢個地步。佢又話,警察因為「少數暴力示威者」疲於奔命,佢好希望警方繼續努力,保障巿民生命同財產,同時又指大家要畀林鄭更多支持,「鼓勵林鄭更大膽做政策上的措施」,唔通引用《收回土地條例》向地產商收地,就係屬於「大膽」嘅政策?

10.1國殤遊行

一格照片,一個故事,Follow蘋果Instagram!
BannerBanner