【蒙面惡法】蒙面遊行「女CID」哽咽斥火上加油 轟林鄭擺警上枱

更新時間 (HKT): 2019.10.03 22:13

政府擬立法禁止市民在遊行集會時蒙面,有自稱CID的女警今日致電港台節目,要求特首林鄭月娥「唔好擺我哋警務人員上台」。該女警更透露,反送中運動以來,曾經蒙面與市民一齊遊行;她也反對政府立《蒙面法》,斥提出有關建議的人士火上加油,「我都有參與過(遊行)呢排……但唔係全部,但我係有蒙面嘅,因為我唔方便畀人知我身份。」

港台節目《自由風自由 PHONE》今日討論警方修訂武力指引,其間有一名自稱為CID的現役女警曾女士打上電台,「我係一位女CID,做咗大概4年半,佔中之後加入警隊,我係英國讀完書返嚟。」她承認,警方修訂武力指引「係近排嘅」。

她更聲淚俱下向勇於說出真相的傳媒、議員及社會人士致敬,「我想同各位修例風波呢段時間,肯講真說話嘅傳媒、議員,甚至社會各界,肯講真說話嘅報道,致最高嘅致敬」,又對於同袍的行為感到傷心,說:「我好感激你哋,我聽到我哋同袍……有市民因為咁樣而受傷,好傷心我覺得,點解我哋會咁樣,我唔係好明呀!」

主持人提到,社會對警方使用武力的手法、程度存有爭議,曾女士認同社會有好爭議,又透露「反送中」運動以來,曾經蒙面與市民一齊遊行,「我知係有好多爭議,同埋我想講呢,其實我喺呢段時間嘅遊行,正式與非正式,其實我係有參與過嘅,我話畀你聽唔緊要……即係非正式遊行,即係冇批通知書(不反對通知書)、同埋有正式嘅通知書,我都有參與過(遊行)呢排……某地方嘅有參與過,但唔係全部(都有參與),但我係有蒙面嘅,因為我唔方便畀人知我身份。」

她反對立《蒙面法》,斥提出有關建議的人士火上加油,「我係絕對反對反(禁)蒙面法呢嗰條例,我覺得嗰啲人士所提出簡直係火上加油,同埋我想講林鄭月娥呢嗰人呢,佢可唔可以唔好擺我哋警務人員上枱呢?可唔可以解決呢嗰政治問題呢?」

一格照片,一個故事,Follow蘋果Instagram!
BannerBanner