隔牆有耳:郵票黑衣被河蟹同新官有關? - 李八方

更新時間 (HKT): 2019.12.16 02:20

早排香港郵政早前公佈2020年郵品發行表及簡介,其中一以棋藝為主題、叫「棋樂無窮」嘅郵票,入面一張用圍棋做設計主題,有班黑衫小朋友圍住個白衫小朋友,當時好多人聯想到反送中運動,點知上周五香港郵政發出最新新聞稿,就將郵票入面圍棋小朋友嘅黑、白色衫,改做啡同黃色,好多人質疑係自我審查,更有政圈中人相信同9月調任郵政署署長、之前係新聞處處長,有份同特首林鄭月娥諗對付反送中計策嘅朱曼鈴有關。

郵政解畫:優化設計

八方睇返時間,朱曼鈴9月先調去香港郵政,而呢套郵票早喺9月前已設計、10月先第一次公開。有政圈好事之徒估計,朱曼鈴作為處長,新上任邊得閒理郵票設計,大有可能都係10月公開先知,所以之後先諗方法「消毒」,於是就出手改顏色,雖然香港郵政解釋係純屬設計上優化,之前公開設計只供參考之用,但正如好多圍棋友喺fb批評,圍棋冇咗黑子同白子,仲算乜叫圍棋?連出張郵票都要從政治正確考量,香港以後係咪連圍棋都要禁?

一格照片,一個故事,Follow蘋果Instagram!
BannerBanner