【李八方Online】沙田區會規矩多 議員去廁所要登記咗先屙?

更新時間 (HKT): 2020.01.03 19:44
《蘋果》製圖、王子俊攝
(蘋果日報)

民政事務專員(DO)有個外號係「地區特首」,不過沙田民政事務專員陳婉雯唔止係「地區特首」,直頭係「地區皇帝」。話說新一屆沙田區議會今日開第一次大會,有區議員發現秘書處去唔到,連去廁所都要登記,陳婉雯就一副「吹咩」嘅態度話「社會動盪吖嘛」。

成班沙田區新議員一開始已經反映,過去一個月陳婉雯好似失咗蹤咁,沙田區政丘文俊表示,以前DO會喺開會前主動搵議員傾吓,陳婉雯就無咁做。衞慶祥都質疑,以前可以自由出入嘅秘書處今日竟然唔畀議員入。

點知更奇怪嘅係,區議員鄭仲恆話,而家直頭「拎住張議員證,廁所又去唔到,拎出街警察又唔理你」,反問「你係咪覺得所有議員都好危險?」。公民黨容溟舟都投訴,連去議員休息室都要登記,真係荒謬!

對於咁多古怪嘅安排,陳婉雯亦有相當古怪嘅解釋,佢話「今屆沙田區議會民選議員嘅人數係最多,但係專員只得一個,大家未必見到我,但我嘅團隊嘅回應,答嘅答案都係同以前嘅水準一樣咁高」,然後就賴社會動盪,所以政府辦公室要閂門,入去就要登記。

其實18區都係1位DO招呼十幾廿位議員,陳婉雯第一日返工咩?再者,如果話社會動盪就乜都唔得,咁點解陳婉雯又要出糧、又要食飯呀?睇嚟政治板塊多嘅沙田區議會好快就可以團結,一齊應付呢位曾經手起刀落,DQ參選人嘅「地區皇帝」陳婉雯。

一格照片,一個故事,Follow蘋果Instagram!
BannerBanner