【李八方online】元秋撐封關 遭小粉紅狙擊:民建聯比日本人還要壞

更新時間 (HKT): 2020.01.28 19:50
(資料圖片)

正如民建聯創黨主席曾鈺成話齋,做建制派就係「有辱無榮」。話說民建聯元秋蔣麗芸喺微博出po,講述民建聯建議畀港府嘅防疫措施,咪以為喺微博講就無人鬧,呢次就係被成班忘恩負義嘅小粉紅圍插。真係除咗恭喜之外,都唔知應該講乜嘢。

元秋喺微博嘅po講咗幾項防疫措施,最令小粉紅心跳嘅有兩樣,一樣係「要求禁止從有確診地區的非香港居民入境」,另一樣係「要求香港醫療要優先照顧香港居民,非本地居民要收取本地居民費用」。

身為香港人嘅大家,未必明白小粉紅嗰種心態,到底佢哋嬲乜呢?有微博網民咁講:「民建聯比日本人還要壞,日本人對武漢病患者治療免費」,又有微博網民索性發脾氣話:「口罩麻煩不要向中央要,謝謝」。

講到尾咪又係因為唔畀班小粉紅嚟香港睇醫生,嚟到睇醫生就要收錢囉。不過元秋唔使驚,班小粉紅其實係金魚記憶兼好忙,因為佢哋朝早反美、中午反韓、夜晚反日,有時間仲要反台獨、反港獨、反藏獨、反疆獨,好快就唔記得元秋講過啲乜㗎喇。

一格照片,一個故事,Follow蘋果Instagram!
BannerBanner