【李八方online】禮義廉連日狙擊醫管局口罩下落 網民一句KO:CSi啲口罩去向又唔關心?

更新時間 (HKT): 2020.02.10 19:09

林鄭政府冇罩用,搞到全香港人都為罩瘋、為罩狂,當大家都為口罩張羅時,民建聯唔知係咪想幫政府轉移焦點,連續兩日喺Facebook出po,狙擊醫管局口罩存量大跌,講到有醫護人員偷口罩等。其實關於口罩存貨量,更多人門關注懲教署出產嘅CSi口罩去晒邊?點解有人影到民建聯同工聯會大派CSi口罩?偏偏民建聯冇關注呢一點,難怪網民群起攻之。

醫護界發起罷工促封關,相信令藍營唔多順眼。民建聯就一連兩日喺Facebook發帖狙擊醫管局,例如引述《明報》資料話醫管局喺1月2日至2月8日嘅38日期間,口罩存量跌咗成3千萬個,又喺帖文附上偷口罩嘅新聞連結,質疑「醫管局3千萬口罩去咗邊?!」

隔咗一日,死心不息嘅民建聯今日再喺Facebook以題為【9日用1600萬 4600萬怎樣夠用3個月】發帖,自稱噚日提出跟進醫管局口罩,「引來很多的討論,實屬好事」,續狙擊醫管局話未有確診個案時,若「正常用口罩量」係每日用177萬個,點解醫管局喺1月份嘅記者會三番四次話4,600萬個口罩足夠3個月存量呢?話希望得到醫管局令人信服嘅解釋。

其實呢,醫護團體杏林覺醒同本身係公立醫院醫生嘅九龍城區議員鄺葆賢已分別發帖反駁,鄺葆賢怒斥民建聯「唔識可以問,但唔好衝出嚟_可以嘛?」,解釋公立醫院照顧每個病人每日嘅「最低消費」係16套保護衣連面罩口罩,杏林覺醒就斥民建聯無盡力向特首反映全面封關嘅重要性,「反而質疑緊守崗位的公立醫護人員?」

好在市民眼睛仲係雪亮,唔少網民一語中的:「CSi啲口罩去向你哋點解唔同時質詢呢?是否經你哋派發?」、「CSi口罩分曬畀民建聯工聯會啲人有曬相證明,嗰啲口罩分畀你哋,你哋唔係用嚟派畀公公婆婆,係自己用同屋企人用!」。

其實最愛喺網上搞批鬥嘅全國政協副主席梁振英早前都喺社交媒體質疑,醫管局僱員早前召開記者會時佩戴的口罩是否屬於醫管局,「有沒有盜竊之嫌?要不要報警?」有冇政治目的?大家心中有數。

《果GYM》隨身播  健身壹App過!

一格照片,一個故事,Follow蘋果Instagram!
BannerBanner