【李八方online】「車公」之鋒落港共面 10萬口罩今抵港贈基層

更新時間 (HKT): 2020.02.11 16:51
今次仲唔係車公顯靈?

面對無能特區政府,香港人自上月底武漢肺炎爆發至今,仍然要為撲口罩煩惱。有連登仔上月底就一度出po,題為「如果呢個時候之鋒deal到D口罩返嚟,落唔落到港共面?」有連登仔當時就笑出po嘅巴打「當gphone係車公咩」,之鋒睇到就用咗個戚眉emoji公仔喺facebook回應。

唔知係咪車公顯靈?今日下晝之鋒就企喺一個裝滿口罩嘅貨櫃內,宣佈眾志成功從美國採購10萬個口罩,並已安全到埗兼順利清關,佢剛到機場攞貨!

之鋒話,喺中國商人持續炒賣口罩下,港人採購口罩嘅工作可謂相當艱難,好在佢過去數年做過好多國際游說工作,喺美國累積唔少有用連結,加上一眾喺紐約嘅港人熱心幫忙下,先能夠將大批口罩運抵香港!

為令大家用得安心,眾志已用咗唔少時間查證生產商品牌,確保有實際防疫功用,同時以最短時間將所需款項電匯到美國,阻止大陸用即時現金交易「搶單」。

由於近期飛來香港嘅航班大幅減少,貨櫃位變得非常罕有,眾志最終需要比平時多付3至4倍嘅價錢,先有航空公司願意承運呢批口罩,認為今次成功入貨,反映黃色陣營嘅國際戰線一樣為香港人做到嘢!之鋒預告,今次部份口罩將交由友好民主派區議員協助社區有需要人士,尤其係基層、清潔工人同長者,其餘就會喺眾志網店( https://www.demosisto.hk/shop/onlineshop.php?lang=zh )以低於成本價發售,叫大家留意眾志短期內嘅公佈喎。

《果GYM》隨身播  健身壹App過!

一格照片,一個故事,Follow蘋果Instagram!
BannerBanner