【李八方online】何柱國給林鄭的「情書」

更新時間 (HKT): 2020.02.14 13:30

今日係情人節,星島集團主席、全國政協常委何柱國就喺《星島》寫咗封全版嘅公開「情書」畀林鄭「溫故知新」,佢提起林鄭兩年前嘅講過「拭目以待」同埋「如沐春風」嘅往事,仲話林鄭好快就可以「追」到佢。真係相當浪漫。

何柱國呢封署名情書,用「林鄭金句 溫故知新」做標題,回憶起兩年前林鄭兩次嘅說話。第一次係2018年9月,林鄭喺「東周刊15周年」慶典上,提點《東周刊》話品牌要有3個特質:可信、可靠、與時並進,而《東周刊》再過一段日子滿唔滿足到呢3個要求就要「拭目以待」。第二次都係2018年12月,林鄭講過「如沐春風」。

呢個「如沐春風」嘅出處,八方搵到嘅就係18年12月中,林鄭喺內地改革開放40周年專題研討會上話,佢率領嘅訪京團見國家主席習近平嗰陣,充份肯定、高度讚揚香港人喺改革開放中發揮嘅作用,令到訪京團每位成員都「如沐春風」。而何柱國就係訪京團成員之一。

何柱國提起林鄭呢兩句說話,係因為佢覺得講「拭目以待」,家陣林鄭呢個品牌「一落千丈」,講「如沐春風」,林鄭到今日講都仲係笑笑口,但香港市民就慘,日日「如沐寒風」,無好日子過。跟住何柱國仲自爆讀書嗰時成日包尾,而年年考第一嘅林鄭,民望亦都係包尾,就快追到佢。

咁點樣先令香港人有番好日子過呢個問題,何柱國好似知道答案,但佢無講出嚟,只係話大家都知,跟住佢亦感慨,如果香港人捱得過現時空前困境,都係靠香港人「一己努力、韌力行番出來」,紅字兼間住咁強調「並唔係靠特首帶領我哋」,然後再奉勸林鄭唔好使晒納稅人嘅血汗錢。

其實呢封「情書」旁邊,亦有一篇署名「李猜猜」嘅全版鴕鳥漫畫,主要係寸林鄭硬推送中惡法時話前三任特首「鴕鳥」咗22年,結果全民反對惡法,林鄭被迫收回,同時醫護話03年嗰陣啲防疫裝備仲好過而家,試問「邊個先係最大鴕鳥?」

《果GYM》隨身播  健身壹App過!

一格照片,一個故事,Follow蘋果Instagram!
BannerBanner