【撐蘋果儂牆】真黃報攤閘外貼儂牆 報販:講真話係啱 會繼續撐落去

更新時間 (HKT): 2020.08.21 00:20

警方以「港版國安法」為由,上周一(10日)派200人進入《蘋果》大樓作大規模搜查,並拘捕多名壹傳媒高層,但《蘋果》依舊無懼打壓堅持報道真相,翌日更有市民發起「印白紙都照買」行動,全城掀起一片搶購《蘋果日報》潮,連日來不斷有市民、商戶買下A1及內版廣告,包括上周六(15日)佔13個全版的「連儂牆」撐《蘋果》。除了熱心市民買《蘋果》撐「牆」外,有「真黃報紙檔」同樣撐《蘋果》不畏強權報道真相。


網民所指的「真黃報紙檔」位於灣仔,檔攤的閘上貼滿《蘋果》連儂牆、「撐!《蘋果》」、「#WeNeedAppleDaily」、「#PressFreedom」海報,亦有「應有此報《蘋果》」、「我哋真係好X鍾意香港」等字句。報攤職員貞姐寄語《蘋果》:「繼續堅持,講真說話係啱嘅,我哋會繼續撐落去。」

貞姐在灣仔的報攤做了10多年,她指去年的抗爭運動爆發後,自己深受感動並想出一分力,此後陸續有自發的市民寫上心聲,貼在報攤外的閘上,成了該報攤的連儂牆。貞姐印象深刻的是,去年警暴不斷時,有一位年老的客人第一次經過報攤,並畫上一張人面,人面上流了一滴眼淚,並寫上:「香港人哭了。」

早前大批警員闖入《蘋果》大樓搜報館,貞姐直言感到憤怒,「點解香港會變成咁?香港係咪冇新聞自由呢?」翌日全城搶購《蘋果》撐新聞自由,貞姐記得當日《蘋果》銷量大幅上升:「(8月11日)《蘋果》都加咗報紙畀我,轉頭司機都問我使唔使加紙,平時《蘋果》賣30幾份,嗰日(11日)加咗紙之後,又同行家抆咗啲,都有540份。」

當日網民聲言印白紙都照買《蘋果》,貞姐相信不是戲言,「我都覺得大家會支持,因為(當日)之前都收到客戶消息,『聽日冇囉喎、聽日白紙喎』,都有人咁同我講,但啲人又話白紙都照買,我都係印白紙照賣咯。」貞姐並指,自己做了10多年報攤,都沒見過讀者如此踴躍支持一份報紙,達到「印白紙都照買」的程度,「如果真係印白紙、無字報紙,係一個經典,要保存」。


獲封為「真黃報紙檔」 貞姐多謝連登網民支持

寄語:齊上齊落 大家加油

對於連登網民「叛徒」出post封貞姐所在的報攤為「真黃報紙檔」,貞姐指Post貼出之後多了不少生面口的客人,而且持續光顧,不少是年輕人,「佢一行埋嚟我就知佢買《蘋果》㗎喇」,也有「轉會」的熟客,「其實我有啲睇《東方》嘅客轉咗睇《蘋果》,即係有啲藍絲可能轉黃啦。」

貞姐記得早前疫情嚴峻,報攤曾協助向市民派發口罩,包括印有「時代抗疫」的文宣,有一位取口罩的婆婆埋怨:「使唔使黐咁多嘢?」貞姐即表示口罩是勇武抗爭者送的,但婆婆看來仍有不滿,「都唔使黐咁多嘢㗎」,貞姐即問:「咁你支唔支持林鄭(抗疫政策)?」婆婆隨即「收晒聲」。

回應「真黃報紙檔」的稱號,貞姐笑稱自己真是黃絲,但她坦言並不是刻意想以此作招徠吸客,純粹是為社會出一分力。她回應連登網民表示,「首先多謝佢哋先啦,齊上齊落啦,大家加油啦,香港人一定贏嘅」。對於連登網民「小西灣富城」提議食開煙的手足幫襯,因為賣煙賺得最多,貞姐則笑指多謝他的建議,但「煙唔係賺得最多,賺幾蚊一包,其實拉番勻計,書呀各樣其實都係差唔多㗎咋。」

《蘋果》受封鎖搜查報館後一周,銷量沒有大幅下降,貞姐指,「我覺得香港人真係好齊心,黃嘅可以好團結,搞到個黃色經濟圈,有咩事時候手足會互相幫忙」。對於搶購《蘋果》是不是三分鐘熱度,貞姐斷言不覺得:「冇(三分鐘熱度)喎,佢哋都繼續再支持,仲要畀一個月嘅錢訂報紙,每一日落嚟攞。」

貞姐摺疊《蘋果》報紙時又會加入些文宣,當日的文宣是「揸緊信念 修文習武」,盼寄語港人在抗爭同時也要文武兼修。

對於港府近日頻頻打壓異己 ,被問到貞姐的報攤被封為「真黃報紙檔」後擔不擔心被藍絲或警方「搞」,貞姐直言:「你話唔驚就假嘅,但係都要發聲。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新

iOS / Android

一格照片,一個故事,Follow蘋果Instagram!
BannerBanner