【爭位互咬】鼠芬合照拒踎低 先俾元秋當狗嗌sit! 再被象哥扯開

更新時間 (HKT): 2020.09.01 22:17

捉過鬥獸棋嘅朋友,都會知道老鼠係大象嘅剋星,估唔到建制派今午齊集立法會大堂,為全民檢測宣傳造勢期間,亦出現「鼠王芬」梁美芬硬撼民建聯「象哥」黃定光一幕,最終現實比棋局殘酷,鼠王芬喺象哥手大力拉扯下,一度失平衡幾乎跌低!

話說今日着裙嘅鼠王芬,原本同象哥一齊企喺前排,其後由於建制派議員人多,唯有分成兩排影相。其間民建聯「元秋」蔣麗芸即隔空施展獅吼功,向企喺前排嘅梁美芬高喊:「踎啊,美芬!踎!踎!」梁美芬則不為所動,反嗌:「唔踎!唔踎!」

被「美芬」遮住嘅象哥相當不滿,加入叫梁美芬踎底行列,但梁繼續企硬,並向象哥話:「你可以企前面㗎!我無阻你喎,你咪企前面囉!」元秋再為黨友象哥出頭,舉起食指指向地下,好似指揮啲狗咁喝令鼠王芬:「美芬,sit!」鼠王芬堅拒就範,回敬一句:「我唔鍾意sit咪唔sit囉」。

象哥此時更加扯火,怒吼:「喂,妳係咪咁樣企啊?梁美芬!」梁美芬聽到後似乎相當不耐煩,一度用手踭叫象哥企前,此時象哥終於嬲到爆煲,出手大力扯梁美芬去較後位置,令梁美芬即時嚇到嗌咗出嚟,身邊嘅建制派議員睇到亦呆咗。最終係由元秋打圓場,自動讓位畀梁美芬,自己去前排踎低。

八方事後問過象哥點解咁嬲?佢話唔明點解梁美芬係都要企喺佢前面;梁美芬事後就力斥象哥「真係離晒譜」,話覺得自己真係好無辜,解釋今日堅持點都唔踎低,因為着咗裙唔方便,「我真係着裙吖嘛,點踎啫?」


元秋大讚棉花棒「好soft」

八方今日現場所見,42名建制派議員中,32人出席合照環節,當中27人即場接受檢測,即係有成多達10人無蒲頭。咁接受咗檢測嘅議員有乜感受呢?元秋就話進行咽喉拭子測試時,醫護人員叫佢唱歌咁樣就可以,佢就大讚棉花棒「真係好soft」;至於進行鼻咽拭子測試時,佢就話由於平時都有用水洗鼻,所以覺得「very good」,多次向記者強調:「絕對唔會痛!絕對唔會痛!」。何君堯就話進行鼻咽拭子測試時,好似俾人喺個鼻灌水咁,但強調:「不過好容易受嘅啫!前後夾埋都係30秒」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

《本土情味》結集《飲食男女》雜誌經典欄目「老字號」文章,記錄香港40家飲食老店的動人故事,見證香港飲食史的甜酸苦辣。即日起,於各大便利店及書報攤有售,並於 《蘋果日報》你的優惠 網上獨家發售!

一格照片,一個故事,Follow蘋果Instagram!
BannerBanner