李八方online︱何君堯狂踩劉皇發妹夫新書:不值一文

更新時間 (HKT): 2020.09.16 18:36

身兼鄉議局執委嘅建制派立法會議員何君堯,同鄉議局研究中心主任、前鄉議局主席劉皇發妹夫薛浩然周不時針鋒相對,近日又上演大龍鳳。何君堯噚日現身鄉議局大會,見到薛浩然本新書《香港馬照跑--東西文化融匯下的香港賽馬事業》,出po狂鬧「不值一文」;薛浩然不甘示弱,今日出聲明叫何君堯「對自己的言行負責」,仲反擊何話:「你無錢買咪唔好睇囉!」

何君堯喺個po度質疑薛浩然本書「全部都是從馬會的資料庫、其他史籍或政府檔案中取得,基本上沒有太大的思維能力需求」,除咗指有500字要作者花啲心思外,「其他都是炒作而已」,跟住仲話本書「竟敢開口要求索價HKD168一本」,佢認為係「不值一文,更替作者感到難為情」,最後仲要批評薛浩然支過百萬薪水,「半份好的功課也交不出來」,原來係因為「不務正業,為馬會出書,鄉議局的錢花得真冤枉」,強調「鄉議局不是金礦,是時候要節流了,冗員不要留」!

今日輪到薛浩然反擊,出聲明話本書確係用咗馬會同學者嘅資料,但整合呢啲資料再做評說就係佢嘅個人學術體現;講到錢嗰方面,薛浩然仲強調可能何君堯唔太清楚,佢個人同研究中心,以至鄉議局嘅工作同財務安排,所以提醒何君堯喺社交網上嘅陳述不實,勸何作為公眾人物要對自己嘅言行負責。


薛浩然:何君堯喺套丁案做過乜?

薛浩然同八方講嗰陣再鬧何君堯,佢話可能何君堯無認真睇過本書啦,其實佢本書唔係科幻小說,係講香港賽馬歷史文化,咁梗係會引用好多資料啦,而且佢都有訪問馬會行政總裁應家柏,對方甚至希望佢可以將本書譯成英文版添。

至於何君堯話本書賣168蚊好貴,薛浩然就話:「你(何)無錢買咪唔好睇囉!」佢噚日之所以放書喺鄉議局大會只係想送畀大家睇。而若然講錢,薛浩然話鄉議局係無畀錢嘅,只係研究中心同自己向外籌款,佢反問何君堯喺套丁案又做過啲乜?連搵何君堯律師樓都開單啦。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner