隔牆有耳:1.7億元捐四大學 信函呼應紅顏知己 
誠哥《赤壁賦》寄意(李八方)

更新時間 (HKT): 2020.09.17 02:00

首富李嘉誠上年一句「黃台之瓜,何堪再摘」,令佢被貼上「暗黃」標籤,一言一行更受關注,大家好似猜謎咁估佢言論背後係咪暗藏玄機。佢名下基金會噚日喺fb宣佈,誠哥首次同時向港大、中大、科大同教大四間本地大學捐款共1.7億元,而誠哥畀四大嘅信函,大家睇完行文,發現都幾可圈可點,同佢嘅「紅顏知己」周凱旋早前引用聖經嘅「萬物有時」評林鄭月娥,似有所呼應。

「知識改變命運」

誠哥封信開首一段話自己最近喜獲一幅《赤壁賦》書法,筆力曲折「盡顯蘇子刻骨之真率」,更令佢諗到天地萬物間流逝嘅「變」與「不變」中,大家點搵同展現自己嘅角色,繼而帶出蓄發創新係求存立足未來嘅力量,而「知識改變命運」雖然係老生常談,但箇中就有「取之不盡、用之不竭」 嘅永恒。

從內容推斷,相信誠哥嘅書法寫嘅係《前赤壁賦》,蘇軾夜遊赤壁時所作,借曹孟德《短歌行》寄意,即使顯赫如曹操亦僅能一時稱雄,不過更重要係最後一段四句:「且夫天地之間,物各有主,苟非吾之所有,雖一毫而莫取。」天地萬物各有其主,若不是自己應該擁有的,即令一分一毫也不能求取,似乎同周小姐評林鄭下台嗰句「萬物有時」「There is a time for everything」相互呼應。

唔止中文稿有呼應,八方再睇埋英文版新聞稿,原來以「Within Eternity, Time Passes Within Time, There Is Change」為題,同樣好似呼應緊「萬物有時」呢句,唔通誠哥真係意有所指?

李八方

一格照片,一個故事,Follow蘋果Instagram!
BannerBanner