香港警察濫權濫捕惡行實在罄竹難書，由7.21唔見人，到近日喺行動中將大肚婆拉扯同箍頸倒地、將12歲女童膝壓制服，每一幕都令香港人氣上心頭。但總有人唔知係眼盲定心盲，完全睇唔到港警惡行，好似老婆都做過警察嘅前刑事檢控專員江樂士今日就喺報章撰文撐警，佢竟然讚揚香港警察盡力維持一國兩制，獲頒諾貝爾和平獎也當之無愧。
向來撐警嘅江樂士喺英文《中國日報》撰文，話有483個警察喺反修例運動中受傷，形容警員無私地將自己置身於危險之中，冒住會受傷嘅危險（That the officers have, for the greater good, selflessly placed their lives in danger, with many being injured in consequence）。所以當出現有人襲警被控嘅時候，就要確保被捕人士嘅控罪如實反映罪行嘅嚴重性，咁先達到阻嚇目的，亦都為警察執勤提供更大保障。江樂士又舉出6項警員受襲、受傷情況。講嚟講去都係想加重刑罰咁喇。
好喇，其實全文最震撼就係尾段，江樂士話，如果警方處理示威時示弱，中央政府就會被迫派「老解」解放軍處理，到時將會對港人嘅生活方式影響深遠，正正係因為香港警察「盡忠職守，遏力保護市民安全」，確保「一國兩制」持之以恆，所以佢覺得獲頒諾貝爾和平獎都係受之無愧咁話。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS / Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
