鄺葆賢渣男喻鄧炳強區會噍完鬆 妙解逐鄧令獲激讚:明知佢嚟傷你 仲畀佢傷?

更新時間 (HKT): 2020.10.16 16:16

近年出席區議會的警方代表,被批評多次藐視由居民一人一票選出的區議員;無理反對區議會議程和開會文件、肆意缺席會議,即使出席也只自說自話,迴避議員提問,甚至擅離職守拉隊離場鬧情緒,卻在門外對傳媒侃侃而談。為遏止此等歪風,九龍城區議會近日不讓警務處處長鄧炳強到訪,鄧開記招反擊。副主席鄺葆賢在電台節目解釋「逐鄧令」時,以「渣男」比喻鄧,斥他只利用區議員做騷:「明知道佢嚟到都係會傷害你,你真係仲畀佢傷害咩?渣男嚟㗎嘛!」網民紛讚鄺的比喻一針見血。

「真心想傾 就唔會一直ban文件 又離席啦」

鄺葆賢日前已在Facebook隔空反駁鄧:「#真心想傾就唔會一直又ban文件又離席啦 #上次盧偉聰放人飛機就得」。她昨在商台指,鄧炳強早前在其他區議會的回應,「嚟嚟去去『三幅被』,淨係想借(區議會)個平台,講自己有幾咁正義,佢啲兄弟有幾咁熱血」,並非認真回答議員,甚至拉大隊在門外開記招,滿足自己對鏡頭慾望。被問到「逐鄧令」是否意味議員放棄質詢,鄺則大爆金句:「如果一個人傷害咗你好多次,明知道佢嚟到都係會傷害你,你真係仲畀佢傷害咩?渣男嚟㗎嘛!」

大批網民紛紛留言,大讚本身是醫生的鄺葆賢講得好:「中point中到啪啪聲」、「有讀書、有腦袋,零舍唔同」。對於有網民質疑,警方的發言「三幅被」,可能是議員的提問千篇一律所致,鄺親自回應:「我睇晒今年咁多次佢去區議會嘅片,每次(議員)問都有唔同,但換嚟都係同樣劇本」。她又慨嘆,即使有會議直播,「無咁多人睇晒全場,節錄喺CCTVB loop住播嘅,咪又係PK Tang自己嘅propaganda先有airtime」,如今「#無得做show哭哭」。

鄺葆賢早被網民盛讚智勇雙全。去年12.1的黃埔警民衝突中,當蒙面警得知當區區議員的鄺到場調停後,不但不尊重民意代表,更疑情緒失控,連番挑釁對方衝擊;反觀鄺夥保安有理有節請警方後退,保護街坊。8月1日啟用、由機場亞洲博覽館改建的社區治療設施,由香港醫管局一手一腳籌備,卻被大陸邀功,辣㷫很多人。鄺葆賢亦在Facebook仗義執言,澄清這是醫管局同事搭建出來,不應連功勞「都要雙手送人」,還直斥「方艙醫院」是不當稱呼,「要叫就叫番本名:『社區治療設施』」。

早前報道:無懼蒙面警咆哮撩交打 鄺葆賢夥保安智勇勸退警獲激讚

早前報道:港自建亞博治療中心被大陸邀功 鄺葆賢嘆同事credit都要送中

鄧炳強厚顏自誇「1打14」 遭踢爆至少14警陪開會

鄧炳強原定昨(15日)到訪九龍城區議會,惟區內14名民主派區議員包括副主席鄺葆賢、民主黨黃國桐、社工曾健超等人聯署,去信主席蕭亮聲,要求他運用《九龍城區議會會議常規》的權力,剔除鄧到訪的議程,避免鄧到場後,只不斷重複既有論調,拒絕回應區議員質詢,此動議最終獲主席接納。聯署信又形容鄧只藉「交流」之名到區議會,實行一場「低級、自說自話、充滿偽善與謊言的政治樣板戲」,又將區議會當成唱好警隊的平台。

鄧其後主動見記者,質疑區議員是否不敢讓他在會議「說真話?」他更厚顏反問:「係咪好擔憂我嘅正義呢?係咪好擔憂佢哋嘅謊話,會畀我道破呢?佢哋有14個人,我得一個,你驚咩呢?」主席蕭亮聲則反駁鄧自誇「1對14人(區議員)」之說,踢爆警方由「知會」會方指鄧會到訪開始,一直堅持安排包括鄧氏在內至少14名警員在會議室,甚至未計算警方堅持在會議室外候命的警員人數,故此鄧絕非「1對14」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner