隔牆有耳:挑機689「教師非唯一激進源頭」
劉鳴煒:社會不穩源於某官(李八方)

更新時間 (HKT): 2020.10.21 02:00

早排全國政協副主席、前特首梁振英加埋政府連環出手打壓老師,將反送中年輕人上街、學生對政府不滿瀨晒落老師度,以為咁就可以向中央交到貨,不過青年發展委員會副主席劉鳴煒就唔係好認同689等人嘅做法,認為將青年人激進嘅源頭講成係教師,係單一化同過份簡化,又話普遍市民同青年覺得,香港社會不穩源於特區政府或者某位官員,好多網民猜測,劉鳴煒講嘅某位官員係邊個呢?

劉鳴煒噚日接受民主黨前主席劉慧卿嘅網台節目訪問時,話作為商界、建制派,覺得林鄭押後施政報告出台,因為要加入惠港嘅大灣區政策係好事,但重點係市民要感受到有好處、要打工仔buy-in(接受)、感覺到、共同受惠先得。

稱社會復和要睇時機

佢又話港版國安法立法後示威暴動係減少咗,短期社會安定咗,但要長期穩定就要解決人心問題,但要社會復和係要睇時機,要揀啱時機去做,對於689話青年人激進的源頭係教師、仲公開教師資料,劉鳴煒就唔多認同,佢承認教師對學生有好大影響力,要做好本份,但香港咩青年都有,激進、深藍都有,所以唔可以單一化或過份簡化分析,其他地方被激進化過程見到,通常源頭有好多,例如網上資訊、其他人煽動等,唔係一個半個源頭,佢仲話普遍市民同青年覺得,香港社會不穩問題或者係源於特區政府、又或某位官員。

劉鳴煒冇講某位官員係乜水,好多網民猜測佢係講777定係保安局局長李家超?定係俾好多人鬧嘅政務司司長張建宗、教育局局長楊潤雄、定係一哥鄧炳強呢?

李八方

一格照片,一個故事,Follow蘋果Instagram!
BannerBanner