隔牆有耳:港大下月搞講座 邀專家談法治(李八方)

更新時間 (HKT): 2020.10.28 02:00
吳靄儀

呢一年藍絲們成日話法治就係守法,政府亦經常自詡「依法」施政,但究竟咩係法治?港大學生會法律學會喺下個月將舉辦連串以「思.法」為名嘅公民講堂同法律論壇,探討當今社會中,法律對大家有咩意義?嘉賓名單包括終院非常任法官包致金、大律師吳靄儀同埋前港大法律學院副教授戴耀廷,可謂星光熠熠。

呢次法律學會之所以舉辦「思.法」講座,正正係因為過去呢一年嘅社會衝突,由修訂《逃犯條例》嘅法律而起,隨《緊急法》立《禁蒙面法》升溫,再到《國安法》漸見止息,於是「法律對我們有何意義?法治的概念在今日香港究竟是自由的守衞或是桎梏?」等問題應運而生。

下個月舉辦嘅「思.法」講座合共有四場公民講堂、一場法律論壇,探討有關法治嘅各種問題。除咗包致金、吳靄儀、戴耀廷外,仲有好青年荼毒室同埋「法夢」嘅成員等,每場都設有台下發問環節,參加者可以直接同嘉賓交流。與其自己有時諗唔通,不如聽吓專家點講啦,至於活動詳情可參考港大法律學會fb專頁。

李八方

一格照片,一個故事,Follow蘋果Instagram!
BannerBanner