李八方online︱篤灰西九龍中心性感廣告翻尋味 民建聯劉佩玉狙擊區會「仇恨警察」橫額

更新時間 (HKT): 2020.11.08 16:07
設計圖片

文革批鬥席捲香港,梁振英大力搞緊教育界、警方設立國安「篤灰」熱線圍堵黃營,建制派都唔執輸,年初已組成「議會監察」聲稱要監察區議會運作,狙擊目標無非係去年11.24區選大勝嘅民主派。

民主派光復區會即將1周年,喺去年大敗嘅建制派都要有啲「表現」。民建聯嘅劉佩玉同工聯會嘅葛兆源今日以「議會監察」名義舉行記者會,話過去1個月喺各區進行「攬炒派『播毒』橫額大搜查」行動,至今發現84條banner涉及「抹黑」政府、散播仇恨同宣揚仇恨警察情緒,例如「反對大灣區種票」、「警黑合作,市民受害」等。「議會監察」斥民主派製造社會對立,又認為唔少政府部門做得不錯,反問:「點解唔讚吓政府呢?」

難得佢哋有此反問,八方都好想問,同樣地唔少政府部門做得好差,點解保皇黨唔插吓呢?

講到最尾,佢哋要求政府設立審批橫額準則,如果唔符準則,民政署就唔應該發還開支,自費懸掛嘅就要即拆兼收拆除費,政府仲要同時喺地區懸掛澄清謠言嘅橫額。當然少不免「鼓勵」大家做紅衞兵,呼籲市民舉報有關橫額喎。

八方醒起,劉佩玉1個月前以「接獲數十名家長投訴」為由,狙擊本地漫畫家林祥焜幫深水埗西九龍中心設計嘅一系列性感少女外牆廣告,話廣告入面嘅少女「衣着暴露、意識不良」,引起學童不安,仲去商場請願,要求廣告下架。咁無理嘅要求,商場當然冇理佢,喺颱風過後,唔單止重掛林祥焜嘅性感少女漫畫,仲掛起由另一位本地漫畫家甘小文所畫嘅「肥婆四」同「哨牙珍」漫畫,玩味十足。

相關報道:「肥婆四」「哨牙珍」接力 西九龍中心再掛巨型廣告 劉佩玉拒評論:我嘅意見唔重要

相關報道:3幅曾被投訴林祥焜漫畫「歸位」西九龍中心 fb收神秘「恐嚇」:香港不是安全的地方

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner