李八方online︱林鄭讀施政報告 曾國衞呼呼大睡冇面畀 經民聯張華峰睇股票訂大閘蟹

更新時間 (HKT): 2020.11.25 17:30

以往特首宣讀《施政報告》,不少議員例如民建聯黃定光,最鍾意就係喺議事廳瞓到不省人事以示堅定支持。曾國衞首次以政制及內地事務局局長身份進入議事廳,聽特首林鄭宣讀《施政報告》時不斷瞓覺,公然搵周公。可能佢知道自己有北京照住,根本唔使畀面林鄭。佢瞓醒後,可能知道自己有人影住,開始狂抄筆記,但睇佢個款,都係扮嘢居多。至於向來都鍾意喺會議廳內瞓覺嘅自由黨張宇人、民建聯黃定光,今日會上就繼續「陪瞓」。

雖然林鄭嘅《施政報告》以極大篇幅感謝中共同繼續全面打壓民主派,但在場官員同議員各自各精彩,懶理林鄭。有北京照住嘅局長曾國衞喺林鄭讀《施政報告》期間倒頭大睡,而葉劉就喺WhatsApp欣賞曾國衞嘅睡姿。

其他議員都係人在心不在,好似經民聯張華峰咁,寧願不斷睇住個市,留意股票多過份《施政報告》。佢特別留意隻中國海外發展,唔通《施政報告》有呢隻股嘅相關利好消息?佢除咗睇股票,仲訂大閘蟹添,唔知同邊個享用呢?

第四波疫情爆發後,會議廳內除咗林鄭同埋梁君彥,就只有何君堯、郭偉強同「元秋」蔣麗芸無戴口罩,睇嚟佢哋對自己嘅健康同口氣都好有信心。

而行會成員、前教統局局長李國章就喺林鄭宣讀《施政報告》時玩數獨,但喺林鄭一談到教育環節時就即離開立法會。

八方喺會後見到曾國衞,當然唔放過機會走去問吓曾生點解咁眼瞓啦,點知曾生一聽到記者嘅問題後,隨即大動肝火反問記者:「唔好咁無聊啦,啲相你點影到㗎?」佢仲即刻叫附近嘅保安嚟護駕,其實佢又唔使咁嬲嘅,因為全港人甚至西環都已經欣賞咗曾生嘅睡姿。

林鄭今日嘅《施政報告》,係佢任內4份《施政報告》中最長,之前佢只花約40分鐘就讀完成份報告,今日就用咗約2個鐘先搞掂,可能得返建制派嘅立法會,令林鄭更加暢所欲言。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner