隔牆有耳:張華峰訂蟹 李國章「數獨」
大覺瞓斷正 曾國衞扯火(李八方)

更新時間 (HKT): 2020.11.26 02:00

特首林鄭月娥噚日宣讀《施政報告》,雖然民主派、市民批評呢份報告冇面向港人,只係識面向北京,但考慣第一嘅林鄭自我感覺超好,話份報告好到冇嘢批評,啲人先拎呢啲嘢嚟講!其實份報告係咪咁好真係冇得呃人,只要睇吓佢班官同建制派議員,有人玩數獨、有人玩WhatsApp、仲有人交收大閘蟹、有人瞓到被記者狂影相都唔知,份《施政報告》有幾好,心照喇。

以往官員同建制派喺宣讀《施政報告》時大覺瞓好常見,今年冇咗民主派示威,佢哋似乎瞓得特別安心。好似曾國衞首次以政制及內地事務局局長身份進入議事廳,聽林鄭講嘢時竟然公然搵周公,唔通知道有北京照住,根本唔使畀面林鄭?佢瞓醒後可能知道有記者影住,開始狂抄筆記,但睇佢個款都係扮嘢居多。至於向來鍾意喺會議廳內瞓覺嘅自由黨張宇人、民建聯黃定光,噚日會上就繼續「陪瞓」。

葉劉WhatsApp欣賞睡姿圖

八方喺會後見到曾國衞,當然唔放過機會走去問吓佢點解咁眼瞓啦,點知佢一聽到記者嘅問題後,隨即大動肝火反問記者:「唔好咁無聊啦,啲相你點影到㗎?」仲即刻叫附近嘅保安員嚟護駕。

其實曾國衞又唔使咁嬲嘅,因為全港人甚至西環都已經欣賞咗佢嘅睡姿。此話何解?原來葉劉一路聽妹妹讀《施政報告》,一路喺WhatsApp欣賞人哋send畀佢嘅曾國衞嘅睡姿圖,畀人放晒上網,仲有邊個睇唔到!

其他議員都係人在心不在,好似經民聯張華峰咁,寧願不斷睇住個市,留意股票多過《施政報告》。佢特別留意隻中國海外發展,唔通《施政報告》有呢隻股嘅利好消息?佢除咗睇股票,仲訂咗9,600蚊大閘蟹,趕住問賣家攞貨㖭!見佢安排咗4點叫司機去拎,唔知同邊個享用呢?而行會成員、前教統局局長李國章就啩住玩數獨,但喺林鄭一講到教育環節,就即離開立法會。

李八方

一格照片,一個故事,Follow蘋果Instagram!
BannerBanner