張祺忠好友感歎:佢衰就衰在成日唔識講「No」

更新時間 (HKT): 2020.11.26 21:19
張祺忠好友陳梁材

「其實佢個人nice到不得了,所以呢單嘢咁樣就冇人會相信嘅。」與張祺忠相識半世紀的陳梁材,擔任辯方證人,作供後在庭外續談本案,憶述最初以為案件是假新聞,兩年來一直支持身處牢中的張祺忠。陳透露張現今精神不俗,在獄中幫忙計計數,做業餘興趣研究;不過從容背後也許有點裝作堅強,避免朋友擔心,「佢衰就衰在成日唔識講no㗎……」

建築師陳梁材與張祺忠同窗多年,他說張家規矩嚴格,放學總是回家,「我哋男仔舞會、打士碌架,一定冇佢份」。但這無阻張與同學打成一片,「我哋班一個好高大嘅、蝦蝦霸霸、花名叫做技安嘅人呢,都同佢好好,因為佢人緣太好喇……即係同佢攬頭攬頸㗎,咁大個出嚟食飯都仲攬頭攬頸㗎。」陳續謂:「如果佢係壞人,你會唔會咁?你唔會啦。」

好友被控謀殺,陳沒有很多想法,只望張盡快放監,「希望佢同阿Nancy佢哋真係團聚囉,Nancy同阿Scot好錫老豆。」陳不時約張的一對子女見面,女兒Nancy十分擔心父親,不時積極為父親張羅衣服與書本,「講佢老豆possible刑期嗰啲嘢呢,佢就喊囉。」

張向來不帶妻子出席聚會

至於張的妻子,陳只見過三四次,並指張向來不帶妻子出席聚會,「請晒佢哋伉儷,每次都係單拖」。張不談家事,朋友理解是夫妻關係不太美滿,「知道佢太太唔係幾好」,為免難堪,不會談論。

前年案件曝光,陳最初看到朋友節錄新聞,「我第一個反應就係,邊個衰仔喺度惡作劇?」待看到電視報道,始知不是假消息,心中疑問變成:「吓,唔係掛?」陳聽聞張當時有自殺傾向,擔心張不獲家人支持,馬上找律師幫忙,翌日「衝去差館支持佢」,不過未能見面。

一星期後,陳約到張的子女見面,子女都很鎮定,「Nancy好乖女,日日探daddy」。9月28日,陳到收押所探望張,「見佢都好平靜喇,仲同我講笑」。臨別時,張叮囑他有空要找其子女飲茶。

指張假裝堅強

張在獄中從容平靜,陳覺得有點假裝成份,「等我哋唔好擔心佢囉,即係裝堅強咁囉,佢係咁樣㗎」。不煙、不酒、不賭錢、性格好、人緣佳的張祺忠,好友形容他有「缺點」:「佢衰就衰在成日唔識講no㗎,成績要好好,面面俱圓,唔識同人講no囉,呢個就係。」

陳差不多每個月均寄信給張,信中集合同學通訊群組對話,張收到後回話,如是者已三四十封,「全部仲繼續傾偈」。其他同學亦有探望或支持張,有同學是太平紳士,為張在牢中找來計數機。陳指大家都不信張會干犯謀殺,但亦不欲猜測,「索性大家唔再理個內情」。

由於要上庭作供,陳沒有追看審訊報道,從記者口中才得知張承認誤殺,辯稱因為和老婆關係轉差、工作壓力大、健康欠佳等原因而失常。陳指張所言符合其觀察,因張近年消瘦甚多,又經常推卻聚會,「我探監嗰陣時,佢個精神仲好過(案發)嗰陣時」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner