李八方online︱曾國衞議事廳瞓覺賴食咗抗生素 稱頸椎退化要「擰來擰去」

更新時間 (HKT): 2020.11.27 18:40

傳聞由北京親自欽點接任政制及內地事務局局長嘅曾國衞,日前俾傳媒影到喺特首林鄭月娥宣讀《施政報告》期間呼呼大睡,果然有阿爺撐腰就連林鄭都唔使畀面。政務司司長張建宗今日去電台仲要幫曾國衞解畫,話曾國衞係太攰先至瞓着。而曾國衞本人就主動喺下午記招交代自己嘅身體情況,將自己瞓着嘅原因歸咎於扁桃腺發炎,「食咗抗生素、消炎藥」,因此令他喺立法會上感到「困倦」,加上頸椎有「退化情況」,因此需在長時間嘅議會做「擰來擰去」嘅頸部運動,紓緩頸部疼痛。

曾國衞議事廳瞓覺一事再成眾矢之的,張建宗今日出席電台時本身sell緊《施政報告》內容豐富,但就被主持人明寸:「豐富到有官員聽嘅時候瞓着?」張建宗唯有推說唔係報告嘅重點,又將話題拉返去施政報告同埋藍圖、遠景咁。

點知去到提問環節,聽眾依然對曾國衞瞓覺窮追不捨,有聽眾直頭話,官員聽《施政報告》時瞓覺、又有建制派議員買大閘蟹,反問佢哋嘅表現係唔係好差勁?逼到張建宗不得不回應,承認情況真係唔理想。不過佢隨即幫曾國衞兜,話曾國衞唔係故意,應該係因為太攰、太多工作先會瞓着。

咁講又係,成份《施政報告》都係政治任務,由大灣區投票、修改選舉安排、到修訂《宣誓及聲明條例》全部都由曾國衞轄下嘅政制及內地事務局負責,未來咁多嘢搞香港人,相信曾國衞都有排唔夠瞓。

日前新聞:李八方online︱林鄭讀施政報告 曾國衞呼呼大睡冇面畀 經民聯張華峰睇股票訂大閘蟹

曾國衞稱毋須向林鄭交代

而曾國衞今午喺記招上亦以「免除大家疑慮」為由主動交代情況,解釋自己近日因扁桃腺發炎,要服用抗生素同消炎藥,因而令佢喺林鄭宣讀《施政報告》時感到「困倦」,先會喺立法會瞓着覺。

有傳媒詢問曾國衞事後有冇向林鄭交代、日後點樣避免再發生時,曾大放厥詞指,雖然對自己嘅表現「有啲唔好意思、好抱歉」,但唔認為有關表現會影響日後工作,更反問在場記者有邊個未試過因服食藥物而昏昏欲睡,「如果連咁雞毛蒜皮都去煩特首,佢咪會好唔得閒?」佢又呼籲大家毋須「過份解讀」當日佢瞓着覺嘅原因。

當日曾國衞亦被傳媒拍下喺會議廳內多次轉動頸部嘅照片,他就解釋指,個人本來有頸椎退化,因此需要喺長時間議會做「擰來擰去」的頸部運動,紓緩頸部疼痛。但佢強調,當日只是「狀態較差」,並非自己日常嘅工作表現,因此無特別就日前情況向林鄭解畫,而林鄭亦無就此問佢有關情況。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner