李八方online︱葉劉淑儀自己無得選 硬屈郭榮鏗想做特首

更新時間 (HKT): 2020.12.01 18:28

今日開始民主派議員正式全面撤出議會,就喺今日,盛傳一直好恨做特首嘅新民黨葉劉淑儀,就拍片爆料,聲稱被取消議員資格、已經退出政圈嘅公民黨郭榮鏗想選特首。冇嘢吓嘛?想選嗰個係葉劉自己先啱嘛,話郭榮鏗想選特首,同話個盲人偷睇國家機密有咩分別?

身兼行政會議成員嘅葉劉喺佢自己嘅YouTube頻道話,起初識郭榮鏗時,覺得對方都係啲斯文、正常嘅人,但後來覺得郭榮鏗「政治化」咗,一日到黑都跟足美國口徑話中國打壓人權自由,漸漸仲發現郭榮鏗同美國來往得越嚟越密切。

葉劉嘅「證據」就係郭榮鏗獲得美國副總統彭斯邀請「入屋」,出席彭斯嘅家宴,葉劉仲言之鑿鑿咁反問:「係乜嘢關係呢?」佢認為美國嘅做法,明顯係想栽培民主黨創黨主席李柱銘接班人,幫郭榮鏗贏選舉,「你贏區議會、贏埋立法會、你贏埋選委會,咁你做行政長官都得啦,林鄭都係777(票)之嘛!」

其實葉劉係咪自己恨做特首選恨到傻咗?正如葉劉自己話齋,去年開始嘅內會主席選舉風波中,郭榮鏗一度被兩辦連番炮轟,試問咁仲會有得做特首咩?

話時話,其實八方聽聞過有另一位行會成員,都係覺得郭榮鏗因為無得選特首而投靠美國,唔知葉劉係咪執咗人哋口水尾嚟講呢?

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner