武漢肺炎︱市民無懼疫情郊遊「輕鬆吓」 往大澳巴士站排長龍

更新時間 (HKT): 2020.12.26 16:23

今日天朗氣清兼逢「拆禮物日」,不少市民無懼疫情到郊遊,其中本地遊熱點大澳中午起漸見人潮,不少小食店大排長龍,遊客立即除下口罩大快朵頤。有父母帶同小朋友到大澳入住度假屋,小朋友說已在家多日,聖誕節到郊外遊玩「超開心」;大澳居民選擇往二澳露營,「趁長假期去輕鬆吓」。

東涌往大澳巴士站中午大排長龍,巴士公司加密班次疏導人流,不少人帶同露營背囊和食物,亦有行山客候車,另有人乘船入大澳。雖然大澳區內未見人頭湧湧,但部份小食店則要排隊,有遊客購買小食後即場除口罩大快朵頤,亦有人走到棚屋後巷避開人潮進食。

大澳景點「新基橋」有不少遊人在橋上打卡,橋上掛有橫額提醒市民要戴口罩,惟觀賞海豚的遊覽船沒有開放。

大澳居民、中學生李同學與數名朋友帶同兩大架手推車,放滿食物和裝備,打算往二澳開展三日兩夜露營,「成年無玩過,趁長假期去輕鬆吓」。他指,疫情已持續一年,相信港人已懂得做足防疫措施,「住得喺香港都冇得唔擔心,對於遊人入嚟大澳,佢玩會唔會帶嚟啲咩感染都冇得好擔心,本身就風險一直都係度」。

一家大細住度假屋 小朋友興奮唱歌

3歲的區小朋友隨父母到大澳玩,今晚會入住附近度假屋。戴上印有聖誕裝飾的口罩的她,還即場唱《Jingle Bell》,形容今年聖誕到郊外遊玩感到「超開心」,指自己在家多時,「(喺屋企幾耐?)一日⋯⋯100日。」她指,今年收到聖誕禮物,「係聖誕老人送」。她又說,自己有戴口罩,即使外出也不害怕疫情。

任先生與女友則趁長假到大澳玩,認為人流比想像多,「市區人多,估唔到大澳都咁多人,諗住漁村會少啲人」,又說今年聖誕氣氛還可,但市道不好也不想花費太多,笑說:「(有無送聖誕禮物?)直程唔送啊。」

午後人流更多 黃店感受深:艱難嘅時間特別窩心

午飯時間後,大澳「人群如潮湧」,永安街、街市街、石仔埗街及文物酒店等均如旺角般擠擁,更不時出現單車與人爭路的情況。想一嚐炭燒雞蛋仔和沙翁風味,先要大排長龍;咖啡店也要等位。

大澳黃店「EARTH.er」負責人袁先生說,年初疫情爆發後大澳人流不減反增,即使是平日,人流也較往年多兩至三成,「相信係大部份市民唔係好想喺市區,所以走來郊外」。他指,過往的聖誕假期大澳不算特別多人,復活節和中秋節反而會較旺,「聖誕係幾市區嘅節日」,但今個聖誕假期人流明顯增多,比起前年聖誕假期人流多三至四成。

袁續指,店舖商品薄利多銷,今個假期市民的消費意欲仍算旺盛,「感覺市民係想買啲嘢,但個金額就未必好似以往咁多。可能市民都想趁節日買返少少嘢令自己開心啲」。他說,店舖的客人都很溫馨,「喺艱難嘅時間特別窩心,客人會放低鎖匙扣或者同社會有關嘅文宣,大家會交流。俾錢我就唔係講一句多謝,仲會講大家加油」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner