專訪︱迷失中有着你 90後絲打大狀追連登post 梁嘉善助公民黨接地氣

更新時間 (HKT): 2021.01.04 00:05

聽到27歲的梁嘉善(Jessica)說,最愛歌手是陳百強,當刻冒出黑人問號。「細個屋企成日播歌,聽到陳百強就覺得:點解咁好聽嘅?」當同學情迷英文歌,她就逐一重購陳百強的CD,甚至穿越時空界限,重返MV現場感受時日如飛。以為這位90後好老餅?連登她就日日碌,「最好睇梗係吹水台」,有戶口又會留言,「基本上未推到熱門嘅po我已經睇晒嘞」。她自言,「一啲我鍾意嘅嘢,係會瘋狂咁愛上」,不怕踏千山,亦無介意,大狀絲打風雨下扛上公民黨秘書長重擔,希望她所愛的黨,更加靈活接地氣。

記者 許偉賢

我卻為何偏偏喜歡你?

歲月留下古老街燈照樣發光,「陳百強《感情到老》個MV就喺呢度(樓梯)拍,頭10幾秒係佢(陳)行上去!」三件頭西裝服配幾吋高踭鞋,Jessica在中環都爹利街的經典樓梯,喜孜孜談為何偏偏喜歡你。

她出生於1993年5月,「偶像」在她仍是手抱嬰時離世,一部唱片機、幾張黑膠碟,輕易懷念昨天的你,「佢(陳百強)把靚聲係唱唔同曲風都好好聽!」

當同班同學煲英文歌、捧《High School Musical》,「我自己就聽陳百強⋯⋯都覺得好型㗎喎」。搜羅陳百強CD成為那些年的另類課外活動,沒有特別喜歡的一首歌,卻首首百聽不厭,「聽精選碟嫌唔夠喉,一儲到零用錢,就去買返大碟,啲sidetrack都好正」。最記得曾在將軍澳一間唱片店覓得不少心頭好,因為老闆也是「同路人」,私心入了大量存貨,兩個年代強粉相遇,幾分鐘的「約會」,她捧着一堆珍藏離開。

有幾多感情從不更改到老

「以前香港人嘅歌,今時今日再聽返,都有另一番風味」。Jessica指,包括陳百強在內的不少80年代廣東歌,寫實又貼身,不少內容更涉及移民、分隔兩地,時隔卅年再置身都爹利街樓梯,哼着「為何仍在遠方的你彷彿都知道,我在這刻極需知心傾訴」,時空彷彿又逆轉。她說當年瘋狂得會重返MV景點,甚至觸摸影像中舊物,體會上一個時代的「質感」:「其實呢個動作好變態,但又好特別,感覺到以前香港係咁㗎喎……香港而家已經唔同晒。」

愛尋香港舊故事,可能因愛讀歷史。由小到大被灌輸「讀理科醒啲」的觀念,卻因中三讀到49年後新中國歷史,如土改、整風、三反五反與文革,「嘩!覺得點解咁都得嘅?唔同人嘅決定,足以影響社會。」最終揀選了文科,也關注社會時事,會跟老師到維園出席六四燭光集會,對2010年的「五區辭職、變相公投」印象極深,迷惘裏永遠看不透:「嗰時有諗,點解做做吓立法會議員要辭職?搞咁多嘢但又要再選返?」

我要摘星 不做俘虜

「其實我由細到大都覺得,將來嘅工作係離不開社會,唔覺得要發達或者賺大錢,一定要同社會有某程度關聯」。升讀香港大學,既唸法律又修政治,「其實兩樣嘢有啲類近⋯⋯最終都係點樣令社會達到好嘅轉變。」出身名校庇理羅士的她笑說,早在中學已得悉,「校規都唔一定必然正確」,如不准同學叫外賣,卻又容許高中生外出午飯,「點解咁戇居,你(校方)都要我哋遵守?」

2013年暑假到公民黨議員辦事處實習,其後不時與楊岳橋落區服務,去年成為執業大律師,落腳於「刑事天王」駱應淦的辦事處,也在反修例運動火熱之際,以義務律師身份為被捕者奔波。生活不再淡淡似是流水,今年Jessica首度報名參選立法會,上月更在執委互選下當上公民黨秘書長。

人疲倦也要踏上路途

她說參選執委會,是想將年輕感覺滲入這個或被人感覺刻板的招牌,推動該黨更加機動。近日執委會就有新猷,逢三、五立法會大會及財委會召開時到會外會見傳媒,即時回應政府政策或時事,Jessica便曾與譚文豪等黨友在大樓外批評政府打擊民主派眾籌、斥匿名舉報老師會造成寒蟬效應。人疲倦也要踏上路途,沒有了議會戰線,一樣可以靈活應變。

「堅離地」是從政禁忌,她想令公民黨更接地氣,卧虎藏龍的連登可能是「秘密武器」。眼前隱藏真身的連登絲打笑着說,「吹水台九唔搭八,但又inspire好多創意……早排搞緊最樣衰會員卡比賽,又有人問話阿媽煮嘅嘢幾咁有創意⋯⋯嗯,有啲我都好有同感,哈哈」。她讚連登資訊又快又新,雲集各路高手:「連登朋友成日話『要推到畀公民黨、推到畀OMDB(指楊岳橋)睇』,其實未推到熱門我已經睇咗,有時都會share出嚟畀黨友。」

如內心有夢便全力追蹤

紅線處處下走到政治前台發聲,Jessica直言「考量、驚恐一定會有」,但自覺現時身處的香港,無論是從商大老闆,抑或仗義執言的路人,已經面對着同一程度的壓迫,社會突變,過去的經已不會再出現:「一係你就選擇講嘢講真相,一係你選擇最安全嘅做法,唔講嘢默不作聲;我就係接受唔到自己唔出聲,惟有做另外嗰面嗰一位啦。」

迷糊地世界已漸暗,Jessica直言如此高壓氣氛,市民沮喪失望也必然,但始終對香港充滿信心,「因為香港人真係好叻同好有智慧」。如內心有夢便全力追蹤,仍然煙雨淒迷時,絲打歡迎連登高手多多賜教,「如果有嘢想畀我哋知,記住寫清楚『推畀公民黨』」。一生何求,大家加油。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner