督察屢避答是否片中人 遇官質疑立即確認身份 惹旁聽人士訕笑

更新時間 (HKT): 2021.01.07 22:38

示威者前年10月31日在多區集會,有文員疑遭警員追捕期間拳打警員,及後有網媒女記者嘗試舉手分隔二人,結果文員與記者分別被控襲警及阻差辦公罪,案件今續審,一度供稱女記者「令我追截慢咗一秒鐘嘅反應時間」的涉案督察繼續作供。庭上播放當晚現場情況片段,督察多次以影像模糊「睇唔到」為由,迴避作答當時是否身處片中。裁判官張天雁忍不住稱:「唔好不停話睇唔到,咁樣冇意思㗎。」督察最終表示:「法官閣下,我相信呢個係我本人。」

被告文員譚浚文(24歲)被指於當日在油麻地咸美頓街與彌敦道的交界襲擊督察21982譚健燊,至於網媒女記者郭穎彤(24歲)則被指故意地阻撓譚執行職務。

辯方盤問譚指,有警員持警棍衝向人群,途人見狀跑走實屬常理。譚則謂:「如果冇做錯事,唔會驚。」辯方續指,在當時社會氣氛下,途人受驚逃跑合理,譚仍不同意。

庭上再度播放當晚多部警車趕到現場的片段,辯方問到閉路電視片段中有人從警車車頭位置下車,那人是否督察譚健燊本人;譚卻多次以影像模糊「睇唔到」為由作回應。

譚的回答引來裁判官張天雁出言謂:「幫辦,你咁樣幫唔到法庭㗎。」張官續指:「你可以話可能係我,唔好不停話睇唔到,咁樣冇意思㗎。」張官又謂:「辯方大律師咁問你,係合理㗎……你唔使勞氣,講證據就得㗎喇。」譚隨即謂:「法官閣下,我相信呢個係我本人。」

此時公眾席傳來笑聲,張官即問:「邊個笑呀?」一名中年男子站立直言「係我笑」,並自行離座準備離開。張官見狀謂:「你認錯道歉就得㗎喇。」該男子謂:「我道歉,但我冇錯,因為笑係人嘅自然反應,係忍唔住嘅。」張官再說:「咁你出去啦,你嘅忍耐能力咁低。」惟男子邊行邊自辯說:「我出去,但我一啲都唔低。」

控方下午傳召另一名當天負責拘捕首被告、隸屬西九龍衝鋒隊的蒙姓警員作供,辯方盤問指蒙曾於地上執起一頂帽放進男被告背囊內,惟該帽實是屬於女被告的財物。蒙稱「我依家先知」,又辯稱當時曾問過男被告,他表示屬自己所有。

辯方多番指出蒙從未親眼目睹被告干犯任何罪行,問蒙是否同意。蒙多次迴避,指是聽從「譚sir」指示拘捕被告,結果又惹來張官出言謂:「你有見到咪話唔同意,冇見到咪話同意囉,唔使咁樣㗎。」最終蒙稱「同意」。

【案件編號:KCCC668/20】

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner