隔牆有耳:欠立會薪津 梁頌恆遭頒令破產(李八方)

更新時間 (HKT): 2021.01.07 02:00
梁頌恆

前青年新政立法會議員梁頌恆,雖然上個月高調宣佈咗流亡美國,𠵱家申請緊政治庇護,但佢喺香港因為欠立法會議員薪津嘅民事案引發嗰單破產案,梗係唔會就咁就完。行管會噚日就同法庭講,已預備好晒文件,要求即時作出頒令。聆案官接納要求,頒令梁頌恆破產。

姑姐交文件 官拒受理

提返你先,梁頌恆係因為之前嗰單宣誓風波,同游蕙禎一齊被裁定失去議員資格,之後就俾立法會追薪津同營運資金夾埋186萬,兩人缺席聆訊後就輸咗官司,行管會之後連隨呈請埋梁頌恆破產。

不過,單案中間其實都有段小插曲。話說梁頌恆個姑姐好關心呢個姪仔,所有姪仔牽涉嘅官司,佢都想幫手,仲試過申請加入民事案裏面做「第三方」,但就唔成功。噚日朝佢想就住單破產案,交叠文件入法庭,但法庭之前已作出命令唔收佢嘅文件。結果開庭嘅時候,原本坐喺旁聽席嘅梁姑姐企咗起身,但聆案官幾乎冇望過佢一眼,仲話唔會受理文件,宣佈咗頒令後就散庭,剩番梁姑姐企咗喺度。

李八方

一格照片,一個故事,Follow蘋果Instagram!
BannerBanner