周梓樂死因研訊︱周爸爸哽咽:我可以同個仔講已經盡晒力 真相仲差少少

更新時間 (HKT): 2021.01.09 20:32

科大男生周梓樂前年11月4日凌晨於將軍澳警民衝突期間,在尚德邨停車場墮樓昏迷,留醫5天後不治,終年22歲。死因庭經過29天聆訊,陪審團經過14小時商議後,以4比1裁定梓樂死因存疑。周爸爸在庭外回應傳媒時情緒稍稍激動,但強忍淚水,哽咽道:「我覺得可以同個仔講,我哋已經盡晒力。」他希望有生之年可以知道真相。

周梓樂的爸爸周德明首先說:「香港人都好關心,好多謝你哋。好多謝大家,唔係淨係我哋兩個遇到嘅事,你哋全部都有份……同埋真係好多謝陪審團,佢哋好認真。」

周爸爸坦言:「我覺得可以同個仔講,我哋兩個已經盡晒力。真相好似法官講咁,仲係爭少少。」又謂:「個真相,睇下以後有冇機會可以浮多啲。」他並指有生之年,「希望真相可以出到嚟」,但暫時會先休息,「因為努力都真係努力過,大家都見到」。

仍有很多疑點未解決 「我諗唔係得我咁諗,好多人都咁諗」

他稱,不可說裁決是預計之中,代表大狀陳詞「係我哋嘅心意」,會尊重陪審團決定,「佢哋真係好認真,佢哋唔理時間係點樣,一定要搵到答案」。有記者問結果看似有很多疑點未解決,才會有存疑裁決,周爸爸回應稱:「我諗唔係得我咁諗,好多人都咁諗。」

他又稱等待裁決時心情有些緊張,事前沒特別預計結果如何,「因為陪審團咁認真,答案是值得尊重」。有記者問周父會否覺得裁決是對梓樂的一個交代,周父重申:「我哋盡晒力,只可以做到呢一步,希望梓樂知道。」

梓樂母親則向守候傳媒表示:「辛苦晒大家,辛苦晒。」

散庭後,梓樂父母、親友及律師團隊在證人房外相聚約15分鐘,其間曾在現場治理梓樂、在研訊中作供的17歲義務急救員曾朗軒入內逗留約5分鐘。他偕梓樂父母步出房間後,可見其雙眼通紅。

義務急救員:只還原了一半真相

曾朗軒庭外表示,不同意裁判官指「已經好接近真相」,認為只還原了一半真相,尚有四成是未知的空白8秒,另外一成是質疑警方有否盡力調查。他指警方在案發後一度稱從沒進入停車場,後來改口,質疑警方在「有晒」停車場內行動紀錄下仍說謊,質疑是否曾經試圖隱瞞一些事情。

朗軒又指,無法想像梓樂父母喪失親生骨肉之痛,但港人與周家一起承受這份傷痛,形容事件是香港抹不走的一道傷疤。

至於在房外等候的「白帽少年」崔家朗,則坦言對存疑裁決有「好奇怪嘅感覺」,「就好似裁判官講,離真相真係爭啲,但真係冇方法去解決」。他邊說邊不禁啜泣,「因為其實好多人都好努力,但真係冇辦法搵到嗰8秒」。周父步出房間後,輕搭崔的膊頭。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner