機場拔槍警聲稱執勤遭圍毆 官反問:會唔會啲人睇唔過眼過嚟打你?

更新時間 (HKT): 2021.01.14 23:20

前年8月市民於機場發起「黑警還眼」行動,當日有警員聲稱被示威者襲擊而拔槍示警,兩名涉案男子被控非法集結受審。當日拔槍的警員今繼續作供。辯方指拔槍警當日因撞女子而被圍毆,法官郭啟安亦加入向拔槍警提問:「你高高大大、英明神武,撞低一個矮矮細細嘅女仔,好似蝦人咁,啲人睇唔過眼過嚟打你,會唔會呀?」拔槍警否認,認為遭圍毆只因他「落單」,又稱當時不知只得自己衝入「玻璃屋」,而其他同袍卻全數留在玻璃外。

拔槍警17824黃耀華今接受辯方盤問。被告麥幸雄(23歲)的代表大狀關文渭問到,黃在口供紙上稱當時大批示威者包圍警車,但昨天卻在庭上供稱是收到指示有示威者包圍救護車。黃稱包圍警車或救護車均屬同一件事,因當時車隊連成一線。

黃又稱,他形容示威者為「暴徒」,只是形容激烈或用暴力的示威者,「我認為堵路、破壞物件嘅人,都係暴徒嚟嘅」。黃重申,他進入機場離境大堂的玻璃屋,是為了驅趕示威者返回機場大堂,「唔好畀佢哋出嚟堵塞車隊」。

事後才知獨自衝入玻璃門 「如果我知冇同事入去,我唔會入去」

關大狀讀出黃在案發後兩日、即2019年8月15日錄取的書面口供,提及他下車到玻璃屋門口時的情況。

黃在口供中謂:「突然有一道激光射向我眼睛,隱約見到大堂內一名中國籍男子用強光電筒射向我。我便追截該男子。當追到大堂玻璃門內,我見一名人士正在轉身,我以為他就是較早時用激光照我的男子,於是我把他拉住,可是他失平衡後跌倒。當我望清他的樣子時,才發現他不是男子,而是一名女子。於是我扶起她,突然有十多人衝向我,用拳腳及硬物向我襲擊」。

關大狀稱,根據口供紙,其實黃進入玻璃屋是為了拘捕而非驅散。黃解釋稱「係同一件事嚟」,並謂當時正驅散示威者離開車道,「當中有暴徒令事件發大、發酵,我必須阻止佢哋煽動嘅行為,唔係事件就會擾擾攘攘」。

關大狀質疑,黃的其他隊員全部留在大堂之外,只得黃獨自走入玻璃屋內,反問:「你咁樣單獨入去,你覺唔覺得對自身、同埋要救你嘅隊員嘅人身安全,造成莫大威脅呀?」黃解釋,事後才知自己是「單身入去」,更謂:「我唔知冇人跟我入去;如果我知冇人入去,我係唔會入去嘅。」

強調落單是唯一被毆原因

黃又解釋,女子跌倒只是個意外,「我唔係諗住對佢使用武力,我向個男人方向衝去,個女仔生得矮細啲;我係撞到佢,唔係拉住佢」。郭官聞言稱,警員庭上指「撞倒」女子的說法,與他的口供有出入;黃稱文字上是有出入,最終版本是他撞跌女子,「佢瞓低咗之後,先拉起佢」。

大狀質疑警員庭上講法與口供內容南轅北轍,並稱他的口供誤導律政司。黃承認文字表達「差咗啲」,並謂「我都多謝法官畀個機會我辯解」。

大狀又向黃指出,他被人圍毆是因他撞跌女子,令旁人「睇唔過眼」。黃不同意,稱他被圍毆主因是警員在本來已有暴動發生的地方執行職務,「作為一個警員,要阻止暴力事件發生,係我身陷險境嘅原因」。他又謂:「我嘅工作唔係去撞跌個女子。」

大狀問:「你喺宣誓之下,可以講你當日被圍毆完全同你拉跌個女仔無關?」黃稱:「我認為無關。驅散本身就有危險,我哋警察得二十人,啲暴徒同示威成個機場都係,我都係盡返警員嘅責任。」

郭官此時加入詢問:「讀中史都有教遠因、近因啦。你可能就關注遠因,但近因會唔會係過程中你撞跌咗個女仔?係咪意外都好啦,啲人就諗,嘩,你你高高大大、英明神武,撞低一個矮矮細細嘅女仔,好似蝦人咁,啲人睇唔過眼過嚟打你,會唔會呀?」

黃回應稱,他認為是因當時仇警情緒高漲,而他當時又「落單」、「隻身一人」,「佢哋覺得『搞得掂』呢個警員,就會去做」,認為落單是唯一令他被毆的原因,撞跌女仔與否關係不大。

辯方問作供警:知唔知你嘅口供唔準確,會令被捕人士更加痛苦?

大狀質疑,黃的書面口供與庭上作供有重大出入,是因事後想淡化或否定拉跌女子一事。此時黃稱事發後兩日所錄的口供不準確,是因案發後幾日「瞓唔到覺、日日發惡夢被人圍毆」,並稱自己精神不集中,出現錯誤,「我唔想再提返起件事,因為令我好痛苦」。

大狀聞言反駁謂:「你知唔知你嘅口供唔準確,都會令被捕人士更加痛苦?」黃解釋,事後沒再重溫書面口供,他也只是到庭上有律師問及時,才知道口供有問題。

辯方向黃指出,當時他拉跌女子後,其實沒有即時扶起他,反而是「撳低佢」;黃自己亦心知肚明,他被圍毆與他拉跌女子一事有莫大關係。黃一概否認。

法官郭啟安在黃作供完畢離席前狀似關心問道,黃有否就心情痛苦或失眠等情況求診。黃稱有尋求警方的心理輔導科幫助,亦有看私家醫生,獲處方安眠藥,並稱現時失眠頻率已減少,「好返好多啦」。郭官回應謂:「咁咪好囉。」

辯方今早再次提出反對控方傳召黃作供,但法庭聽取陳詞後,批准黃繼續作供,表明此證人證供只作考慮量刑,不會作為正在受審的兩名被告的舉證證供。審訊明續。

正在受審的兩名被告分別是廚師高穎康(24歲)及清潔工麥幸雄(23歲),他們否認於2019年8月13日至14日在香港國際機場1號客運大樓第8層離境大堂外的暢航路參與非法集結。而同案被告社區主任邱文勁(30歲)及港鐵技工葉文亮(23歲)早前已承認在2019年8月13日於香港國際機場一號客運大樓第八層(非禁區)2號區內,連同其他身份不詳的人參與暴動。

【案件編號:DCCC814/19、DCCC27、DCCC28/20】

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner