李八方online︱長毛同緊密戰友陳寶瑩拉埋天窗

更新時間 (HKT): 2021.01.18 16:10

唔少香港人喺《國安法》嘅低氣壓環境下,對前景完全失去希望,但有人偏偏喺亂世之中,先至搵到真愛。繼岑敖暉早前低調同女友入紙申請結婚後,社運界今日又傳來另一核彈級喜訊,就係「超級資深」社運人士、社民連前議員「長毛」梁國雄原來亦已入紙申請結婚,對象係社運路上多年來嘅緊密戰友、該黨副秘書長陳寶瑩!

根據婚姻註冊處嘅公開資料,長毛同寶瑩係同年同月出生,兩人都係63歲,寶瑩大過長毛25日,兩人同樣曾經離婚。八方今日問過長毛結婚一事,佢就話不作評論,似乎同早前因為參加民主派初選而被警方以涉違《國安法》拘捕嘅岑敖暉一樣,想保持低調。

呢單係社民連近期第二宗喜事,長毛「徒弟」黃浩銘去年12月5日擺酒結婚,當時長毛罕有着上西裝到賀,估唔到事隔一個月多啲就輪到佢自己結婚!

民主路同行10載 曾因到領展抗議一同被控

睇返資料,長毛同寶瑩喺香港民主路上一齊行咗超過10年,其間寶瑩做過長毛嘅立法會議員助理,亦曾多次因為參加社運,包括到領展總部抗議而一齊被告。長毛無做立法會議員後,寶瑩亦經常喺抗爭現場同長毛一齊現身,亦試過一齊主持社民連網台節目。

社運路上同行咁多年,長毛同寶瑩最終決定喺感情路上拉埋天窗,相信港人都會送上祝福。而除因為初選被捕外,長毛仲有官司在身,去年被警方指控煽惑市民7.1參與非法集結,獲准保釋候訊。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner