李八方online︱吳秋北屈記者「誤導」封區罐頭冇拉環 政府還港台清白:部份要用開罐器

更新時間 (HKT): 2021.01.26 17:41
吳秋北屈港台記者「蓄意誤導」,話佐敦疫區派嘅罐頭其實係「有拉環」,結果被港台出稿不點名嚴厲譴責。

除咗六七暴動期間周街放炸彈,工聯會成員仲有咩嘢為人熟悉?工聯會立法會議員郭偉強日前喺立法會嘅發言時,示範咗「造謠」可能係其中一樣,佢將英國《衞報》稱為「世界衞生組織嘅報章」。該會會長吳秋北日前「接力」,喺Facebook指控前日留守佐敦疫區,為巿民報道現場實況嘅港台記者「蓄意誤導」同「濫用權力」,更聲稱港台係「新聞界敗類」。

港台出稿嚴厲譴責

港台記者究竟喺FB報道咗乜令吳秋北「郭偉強」上身?原來就係港台記者指,政府發放嘅食物包入面,「有5包即食麵、一袋通心粉、4罐罐頭及一盒粟米粒,而賓館未有罐頭刀及煮食工具提供」,吳秋北就話罐頭係易揭式設計, 質疑記者歸咎政府有錯。

港台就事件發表聲明,不點名話對於針對該台新聞部嘅抹黑指控予以「嚴厲譴責」,強調港台新聞部日前喺佐敦受限區域嘅報道都係事實陳述。

港台指,當日除咗該台記者指出物資袋嘅問題,亦有受限區內嘅居民反映取得食物包後,因為家中無罐頭刀,開唔到罐頭食用,打算退還,其他傳媒亦有相關報道。睇到呢度,相信香港人對吳秋北嘅抹黑心中有數。

政府Fb出post證有罐頭冇拉環要用罐頭刀開

不過,政府嘅Facebook專頁「添馬台」就喺26日凌晨發帖,指政府容許「受檢人士可按自己的喜好和需要自由選取」食物,而政府提供嘅罐頭食物中,8成有「拉環」設計,「只有少部份需要用開罐器打開」。換言之唔係全部啦,即係有人要用罐頭刀啦,但就無講到幾多人因為收到「無拉環罐頭」嘅食物包而要退還罐頭,唔知吳秋北點睇政府咁「坦白」呢?

梁振英無fact check借機抽水

而前特首梁振英今朝都喺FB發帖,將港台個名「上下倒轉」,以此諷刺港台,家陣政府還港台清白,梁振英會唔會出帖將自己個名掉轉?

警隊散仔會齊加入戰團

圍港台圍得咁熱鬧,又點少得視傳媒為敵人嘅警隊同「散仔會」呢?警察隊員佐級協會主席林志偉今日就寫咗篇感言提到罐頭刀風波,話區內居民家中總會有罐頭刀同煮食用具,港台嘅報道係吹毛求疵,仲話記者所拍嘅「四罐朝天」相係政治抹黑。

除咗「散仔會」,警察Facebook尋日都喺Facebook出圖,表面上係宣傳唔好酒後駕駛,但就特登出幾張罐頭食物正面同反面放嘅相,又特登反轉啤酒罐,係咁話「開到」、「開唔到」,明顯係配合建制輿論攻勢。

其實,唔止港台報道過政府派罐頭無罐頭刀,《蘋果》記者喺報道都提出過相同問題,當時消防處人員就建議記者要問返酒店借罐頭刀;《now》記者亦喺報道中手執意粉同午餐肉,話酒店未必有廚具及罐頭刀,較難食到呢兩樣食物。而曾經報道嘅《南華早報》就話所用嘅相片由區議員提供,已經刪除並致歉。

記協促停政治抹黑

記協亦發聲明,話新聞報道內容係咪失實誤導,公眾可由其他媒體報道、政府公佈等自行判斷,而政府已經確認當日派發嘅罐頭中,唔係全部都係易揭式罐頭,批評有人利用內容爭議攻擊媒體,甚至質疑有關報道有政治動機,係不負責任同罔顧事實,「新聞工作者忠誠地履行其第四權天職,任何惡意指控,絕非文明社會所能接受」,呼籲相關人士停止政治抹黑。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner