武漢肺炎︱墮油麻地檢測劃區 果欄劈價散貨 憂突封區血本無歸:要封快啲封

更新時間 (HKT): 2021.01.27 00:02
果欄被劃入油麻地指定檢測範圍,一有確診,就要強制檢測。不少檔販減價促銷,稱「要封快啲封」,指新年前較多市民購買水果,若盡快封完,才可趕及歲晚重開做生意。

政府在油麻地至旺角劃出指定檢測範圍,一有確診,就要全棟強制檢測,包括果欄和駿發花園。《蘋果》下午約6時到果欄巡視,不少商戶減價促銷,直言「唔知幾時封埋我哋,為散貨㗎咋」。有檔主表示,未知果欄已被劃入指定區域,又稱政府「要封快啲封」,因新年前較多市民購買水果,盡快封完才可趕及歲晚重開。

傍晚時分,果欄人流頗多,不少檔販大聲叫賣,又減價促銷,向顧客表示「唔知幾時封埋我哋,為散貨㗎咋」。另有檔販們討論政府新安排,搖頭無奈表示「又話要強檢喎」,質疑其成效。

居住荃灣區的顧客戴小姐表示,留意到政府擴大指定檢測區域,「又話要強制檢測吖嘛,又話要突擊吖嘛」。她又質疑措施成效,批評政府「啲政策亂咁嚟,好奇怪喎,有效嗎?」她又提到,今日果欄人流算少,稱「從未見過果欄咁少人」,指以往臨近農曆新年,即使平日亦很多人。她又稱雖然果欄是高危地點,惟不太擔心,仍如常來購物。

至晚上7時,政府突襲封鎖油麻地碧街及東安街,禁足居民強制檢測。有果欄職員趕到位於碧街的貨倉了解,稱「啱啱封唔到我哋」,但雖然該位置不在封鎖範圍內,他們仍將倉內水果用唧車拖走。

新增/擴大3劃區檢測

政府除在油麻地至旺角再劃出指定檢測區域,亦在紅磡劃區,並擴大佐敦指定區域至渡船角和柯士甸道,深水埗指定區域則繼續;4區大廈一有確診,就要全棟強制檢測。

●佐敦(東至彌敦道、南至柯士甸道、西至渡船街/文昌街/文匯街/廣東道、北至甘肅街)

●油麻地/旺角(東至彌敦道、南至眾坊街、西至渡船街、北至登打士街)

●紅磡(東北至差館里、東南至寶來街/船澳街、西南至溫思勞街/紅磡南道、西北至漆咸道北)

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner