李八方online︱擦鞋擦上腦?葉劉以廸麗熱巴「證」中國無種族滅絕「揚名國際」

更新時間 (HKT): 2021.01.28 14:09

近日妹妹、特首林鄭月娥忙於同國家領導人、全國政協副主席梁振英隔空拗特首協商定選舉產生好,姐姐、新民黨主席葉劉淑儀就忙於向中央交心,先提議取消BNO雙重國籍,繼而以佢嘅神邏輯,喺Twitter向外國「證明」,中共冇喺新疆進行種族滅絕。

葉太今日貼出一張維吾爾族中國女演員廸麗熱巴嘅相,話美國指控中國喺新疆進行種族滅絕,但其中一個當紅藝人廸麗熱巴,正正係新疆嘅成功故事,反問「何來種族滅絕?(What genocide?)」

葉太貼文一出,誰與爭鋒?各大外媒記者都當然留意到,Facebook專頁「Goodbye HK, Hello UK」就收集咗一眾外媒記者們嘅啜核回應,其中路透社國際新聞編輯Gerry Doyle「應用」葉太神邏輯,話已故著名美國黑人搖滾樂手Jimi Hendrix喺60年代,係最紅嘅音樂人,「咁就證明到60年代美國無種族歧視喇。 」Gerry仲好細心咁喺貼文註明葉劉係香港立法會議員,葉劉今鋪真係「揚名國際啦」。

ITV NEWS駐京特派員Debi Edward都話,多謝晒葉劉,「仲使乜證據呀,多謝晒喎,剩係得成功故事同明星 ,肯定無種族滅絕啦。」

外媒記者真係曲到圓,但法新社港澳台編輯Jerome Taylor轉載貼文就直線抽擊,反問因為一個明星,就證明無犯人道罪行㗎喇咩?另一外媒、經濟學人記者Don Weinland都話葉劉:「出咗條可能係世界上最可恥嘅Tweet」。

香港網民紛紛留言,鬧爆葉劉歪理,有人反駁話「滅絕係過程,如果無晒叫絕種」,又有人笑佢太想做特首,「想到壞咗個腦」;亦有人叫大家唔好咁mean,葉太只係又擦鞋擦出禍。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner