太空卡實名制︱鴨寮街檔主料逾半檔口結業 市民批政府一意孤行「假諮詢」

更新時間 (HKT): 2021.01.29 18:22
深水埗鴨寮街售賣電話卡的攤檔檔主憂有結業風險,直言,「完㗎喇,起碼一半以上做唔住」,有市民直斥措施有政治動機,「根本係藉口去剝削人民自由」。

港府擬推行電話卡實名制,疑以打擊罪案為名實施監控,有深水埗鴨寮街售賣電話卡的攤檔檔主憂有結業風險,直言,「完㗎喇,起碼一半以上做唔住」。市民不但對措施一頭霧水,更擔心私隱沒有保障,亦有市民直斥措施有政治動機,「根本係藉口去剝削人民自由」。

在深水埗鴨寮街售賣電話卡的攤檔檔主許先生稱,若政府堅持推行實名制,生意一定大受打擊,甚至有結業風險。他稱在疫情下,購買漫遊卡的客人減少,此類銷售佔生意額七成,「依家都係蝕住做,夠交租」,若售賣本地卡生意因新措施而再減一半,「完㗎喇,(鴨寮街賣電話卡檔口)起碼一半以上做唔住」。對於政府聲稱措施有助打擊罪案,他批評政府措施目的為取得市民個人資料,「冇嘢搵嘢做,但做咗嘢」。

他認為執行上亦混亂,不少客人是替朋友或公司購買電話卡,或購買電話卡提供予外國客人使用,「究竟係登記邊個名?自己個名?公司個名?定係外國客人個名?」亦不清楚若限期前購買的電話卡,在法例生效後才「開機」將如何處理,「要點登記?返舖登記?」他又稱,他們一般向很多代理購入電話卡,「如果我同十幾廿個代理登記,係咪有十幾廿個system(登記系統)去做?」他又稱,政府聲稱不會規管漫遊卡,「咁如果個號碼係可以打返香港嘅又使唔使登記呢?」他又稱:「如果日後有資料外洩,又邊個孭飛呢?」他指有不少電訊商會租用大型電訊商的網絡發卡,「咁點為之一個電訊商呢?」亦難以限制一人只向一個電訊商購買3張卡。

巿民朱先生稱擔心若買電話卡要實名制,私隱沒有保障,如到小店或攤檔購買電話卡,「佢拎咗我啲身份證資料點算?」他又稱,有不少公司可能會替外國客人購買本地電話卡,「咁人哋係客,會唔會畀護照資料你?」亦會對做生意的客人構成不便。雖然政府聲稱每個人可向每個電訊商購買最多3張電話卡,但不少電訊商背後都是中資背景,若巿民希望避開,只有一個電訊商可供選擇。

他亦擔心,政府實施新措施後,電話卡售價會上升,「如果我買張卡去日本嘅你又要我登記,我一年去幾次咁點算?」對於當局聲稱措施為防止罪行,他認為「好唔顯唔係一個理由,嗰啲人如果要做呢樣嘢(犯罪),都唔一定要用一張香港嘅電話卡啦」。亦擔心警方可隨時向電訊商索取其個人資料,「唔係話預防犯罪就可以無條件、無預先通知咁攞晒巿民資料㗎嘛」。

市民批「假諮詢」 指有多渠道犯罪 剝削自由為實

市民陳先生亦認為措施沒有必要,指不少外國地方都可毋須登記亦購買到電話卡,指是人民的自由,不應受到限制。對於當局稱警方或可在緊急情況下沒有手令下都可向電訊商取得客戶個人資料,他直言「呢個政府已經冇講合唔合理,想做就做」。他指雖然政策對大眾影響不算大,因為未必太多人使用儲值卡,但「呢件唔係小事,因為佢逐漸咁侵蝕你人身自由、個人資料,而家越嚟越大陸化」。他亦直言,公眾諮詢都是「假諮詢」,「佢(政府)一意孤行,我哋都係冇嘢做得到」。對於政府聲稱措施有助打擊罪案,「如果你講緊係網上詐騙案,呢個根本係一個藉口,騙徒唔需要響香港買電話卡,外國上網卡都一樣可以用WhatsApp打電話,其實好多渠道去犯罪,而家先嚟封閉咁原始嘅儲值卡,根本係藉口去剝削人民自由」。

葉女士稱間中都會購買電話卡上網,不擔心個人資料外洩,認為小店應該保存好自己的資料。她認為措施都有其好處,因為她間中會接到懷疑詐騙電話,或經常收到不明來電,此舉可能有助警方破案或找到騙徒。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner