太空卡實名制︱科技界質疑與國安法有關 批諮詢期過短:拆電話亭都諮詢一兩年

更新時間 (HKT): 2021.01.29 17:25

政府今日突然公佈就電話智能卡(Sim Cards)實名登記制度作公眾諮詢。本港資訊科技界指,諮詢期僅不足一個月是太過倉卒,質疑是與「港版國安法」或其他保安原因有關。對於政府指實名制目的是要堵截騙案,他說,現時即使不用太空卡也能詐騙,「騙徒係無成本,佢哋只會諗第二啲方法做騙案,唔會唔做」。

香港資訊科技商會榮譽會長方保僑指,平日有關電訊業的諮詢期,最少有3個月至半年,但今次諮詢期中間是農曆新年假期,即只有不足一個月時間做如此重大議題的諮詢,批評是太倉卒,「拆電話亭都諮詢咗一、兩年」,質疑倉卒諮詢和推行,不但是為了減少騙案,或與「港版國安法」或其他保安原因有關,「澳門做咗、大陸又一早有,跟住國家方向去行囉」。

更多電騙改來電顯示 與太空卡無關

方說,不少電話騙案的確使用太空卡,但現時有更多電話騙案是用其他方法,例如以虛擬話音應用程式,改了來電顯示後再打電話,不需要用太空卡,「早兩年已經講過,(冒認)順豐速遞、猜猜我是誰嗰啲,其實全部都係用假嘅call ID打入嚟,全部同太空卡無關」,更試過有人將來電顯示改為「999」,「扮你屋企人打畀你都得」。

方又指,不少地方也有電話卡實名制,料香港也是勢在必行。內地早已實施實名制,而淘寶網等仍有預付電話卡出售,「要去堵截呢個問題係非常複雜,內地已咁嚴謹都堵截唔到,香港要去做係困難嘅」。他指,政府說實名制可增加騙徒成本,「但騙徒係無成本,佢哋只會諗第二啲方法做騙案,唔會唔做」。

限市民登記3張電話卡 憂造成不便

方表示,政府擬限制每名市民只可登記3張電話卡,擔心會對市民造成不便,例如有市民已有服務計劃,但覺得不夠數據(data),就會買電話卡增補,或者想視乎數據用量去買電話卡,又或是為不同地方接收得較好,才用幾張電話卡等。他說,不明白為何要設數量限制,「如果係實名制嘅,你理得我買幾多張?如果到時你話我張Sim卡畀咗個犯罪分子用嘅,咪我負責囉」。

方指,實名制將增加電訊商營運成本,有業界覺得政府壓下來要做「都冇得揀」,關注政府會否因此有資助,「實名制唔止係整個system,仲要整啲嘢去儲存呢?」而深水埗販賣電話卡的舖頭,也料受影響。

他續稱,手機應用程式的開發公司,會同時插住數十張電話卡做開發,「一個app可能要試好多款不同嘅手機,iPhone、Android好,Android咁多個牌子個個都要試勻,咁而家有個咁嘅限制,剩返嗰啲就可能要上月費,咪好貴囉」。

他又說,實名制除姓名和身份證號碼外,日後會否更嚴格需要人面辨識,仍要討論,因執法、安全和私隱應取得平衡,「唔係個個都犯法㗎嘛」。他指,疫情下部份地方例如台灣,會使用電話卡用作追蹤須隔離人士行蹤,雖然港府推實名制未必與抗疫有關,但這是視乎市民是否相信政府,如政府不獲信任,反而只會引起憂慮。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner