李八方online︱林鄭李家超年初二訪落馬洲警署同警員「開年」

更新時間 (HKT): 2021.02.13 21:26

今日係大年初二,傳統上家家戶戶都會留家開年,特首林鄭月娥反而拉埋幾個問責局長落區,山長水遠到訪落馬洲警署、落馬洲邊境管制站等等,之後先至去深水埗運動場視察吓民情,似乎照顧警員同紀律部隊士氣,係林鄭牛年最大目標。

鳴謝議員為科技園開工即撥300億

行政長官辦公室今日(13日)發稿,話林鄭偕同多個局長先後走訪多個地方,逗留最耐嘅就係落馬洲。佢先同創新及科技局局長薛永恒喺落馬洲警署,遠眺河套地區各項工程和計劃進展,感謝現屆立法會議員短時間內撥出逾300億元撥款,等科技園工作可以「有序開展」,預計首批樓宇可於2024年落成,供租戶進駐。

之前自稱「只剩下三萬警察」嘅林鄭之後同保安局局長李家超到訪落馬洲警署,向當值警務人員拜年,其後亦喺海關關長鄧以海同入境處處長區嘉宏陪同下到落馬洲邊境管制站,探訪當值人員,了解邊境貨車疫情下嘅通關流程,感謝警務處、海關、入境處同衞生署同事緊守崗位。

硬銷「安心出行」都係政府重任,林鄭之後同民政事務局局長徐英偉去埋深水埗運動場,視察運動場用「安心出行」二維碼同登記聯絡資料嘅情況,聲稱市民支持佢哋嘅防疫措施喎。

趁聽日係農曆新年賽馬日,林鄭今晚亦喺Facebook發帖,話幾日前去咗沙田馬場了解馬會防疫措施,知道馬會會為練馬師、騎師同其他工作人員做定期核酸檢測、嚴格執行社交距離措施、要求有感染風險的員工自我隔離等,令賽事喺安全環境下進行。

林鄭話,入場觀眾無疑大減,馬迷惟有喺屋企進行網上投注,但強調馬會嘅經驗話畀佢哋聽,以最大決心做好防疫措施,個人同企業都可以喺「新常態」下維持正常活動。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner