李八方online︱唔似林鄭冇家人撐場 陳茂波老婆豎拇指挺老公

更新時間 (HKT): 2021.02.24 21:58

愛國者治港成為香港主調,根據特區政府最新「定義」,作出損害或傾向損害香港特區的整體利益嘅行為,就會「被負面」,唔係愛國者。財政司司長陳茂波今朝喺立法會宣讀新一份《財政預算案》,「回水」變貸款,派錢變電子消費券,唔知中央眼中,佢係咪及格愛國者?但喺水深火熱中嘅市民應該唔會滿意呢份《預算案》。

唔似得特首林鄭月娥宣讀《施政報告》冇家人撐場,陳茂波太太許步明今朝就有現身立法會2樓公眾席,聽足老公全程發言,蚊都冇放一隻;行政會議召集人陳智思都在場,許步明離開時被傳媒問到點睇呢份《預算案》,佢就話老公辛苦喇,又豎起兩隻手指公讚老公。

曾國衞抄筆記抗眼瞓

會上一眾官員同建制派議員作為「愛國者」,又點樣「無差別」支持政府呢?最重要梗係唔好瞓着先,今朝陳茂波講咗差唔多兩粒鐘,試過聽林鄭讀《施政報告》呼呼大睡嘅政制局局長曾國衞,再次用抄筆記呢招頂眼瞓,抄咗好多張A4紙。

保皇黨唔專心聽《預算案》都算及格愛國者?

其他議員就不時傾偈、玩手機,平時開會經常瞓覺嘅民建聯黃定光未見會周公,但不時同身邊嘅黨友何俊賢交談,唔多專心,身兼行會成員嘅自由黨飲食界議員張宇人就左擰右擰,建制派班長廖長江就不停用螢光筆喺《預算案》文件做筆記,可能望住鮮色嘢醒神啲。

非獨立建制何君堯就開開下會玩Facebook,速評《預算案》,佢話財爺建議今年撥款約近6,254億元,作為政府服務開支嘅金額非常龐大,認為有六大部門開支要瘦身,包括港台、社署、教育局同法律援助署等,仲話「為官絕不能怕難事,愛國不能淨係愛講!」查實佢批評政府「大使」,算唔算傾向損害香港特區的整體利益行為?議事堂上唔聽財爺講嘢出post,又叫唔叫做唔配合行政機關呢?

張建宗長篇覆述夏寶龍言論

而政務司司長張建宗喺陳茂波宣讀《預算案》後,喺立法會主動回應港澳辦主任夏寶龍嘅講話,指自己當日其實都有應全國港澳研究會邀請,以視象方式出席專題研討會,並指對夏寶龍嘅講話十分深刻,隨即長篇覆述夏寶龍早前發表嘅言論,表明特區政府必定尊重喺政治體制完善嘅主導權,同中央作出緊密溝通同全面配合,好似驚人唔知佢好支持北京任何舉措咁喎!

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner