預算案︱市民齊批唔及格「零分重做」 推消費券不如現金「回水」

更新時間 (HKT): 2021.02.24 17:07
本報記者攝

新一份《財政預算案》「減糖」出爐,但回水變派發5千元消費電子券。有市民認為派消費券無意思,寧願政府直接派錢「回水」解民困,又斥責政府抗疫不力,預算案中並沒相關彌補措施,指要「零分重做」。

陳先生認為,政府派發5千元的電子消費券無意思,「其實派錢我就可以(想)點用就點用,儲蓄都好」。又擔心「5千蚊局限咗我做特定行業嘅消費」。他認為預算案只值3分(10分滿分),因預算案未有措施惠及自己。

質疑消費券變相逼幫襯藍店

林小姐表示對預算案感失望,「其實都預咗㗎啦,對依個政府都冇咩期望」。又寧願政府直接派現金而非消費券,「如果要我幫襯返啲美心,咁要嚟做咩?唔會再食呢啲垃圾」。她認為政府派發消費券必定附設條件,「應該使唔到嗰筆錢」。她又形容,預算案要「零分重做」,僅有受惠退稅,對其他措施都不滿意。

同行的另一位林小姐表示,應將所有政府官員「換人」,又為預算案評為負分,「基本上(政府)拎咩嘢出嚟都係垃圾⋯⋯只係想表示佢哋有做過嘢,但其實咩都冇做」。林續指,政府應盡快協助因疫情而受影響的餐飲業,「佢哋生活唔到,仲要肩負住成身債」,又斥政府「唔使再扮幫緊啲市民」。

盧小姐表認為消費券變相逼人每月消費,「派錢會更加實際,電子券用唔晒又唔知點好」。作為學生的她認同學生容易被忽略,指預算案未有措施惠及學生,「學生都好貧窮,應該直接畀錢我哋」。她會為預算案評分6.5分,苦笑指「都叫有啲錢派吓嘅」。

現金更能夠惠及基層需要

劉先生相信發放現金更能夠惠及基層需要,派消費券多此一舉,自己會用於日常生活及小朋友的開支。他不評論預算案值多少分數,因從來沒對預算案存期望。劉續指,期望政府研究減稅,從税收方面「派糖」回贈市民。

從事人事管理的張先生質疑,政府提供「失業貸款」未能即時協助失業人士,認為政府有必要重新考慮派錢,「依家經濟咁差,今日股市都咁差」,政府應積極派錢協助基層,並非只設借貸。他又明言反對消費券,指不清楚當中會有甚麼商戶參與,又質疑有需要人士是否能真正使用到,「直接派錢仲實際」;認為政府可以做資產審查,更集中為基層紓困。他拒為預算案評分,但稱不會有高分數,認為政府難以挽回社會信心。

市民黃先生表示如果消費券可以當商場優惠券使用,措施合適,形容,預算案不過不失,有交税者都能惠及免稅。

盧先生指,政府資源不足及使用地方較多,更反問「其他餐廳派咗幾多錢呀?」、「香港人派咗1萬蚊應該好滿足」。被問及預算案有何受益措施,他卻指「我未睇過,所以未知喎」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner