疫苗接種︱科興疫苗首日開打 老翁讚「大陸嘢」好:咁多人都死到你自己就抵死啦!

更新時間 (HKT): 2021.02.26 16:09

中國科興疫苗今天起正式開始接種,多個疫苗中心投入服務。政府早前宣佈,5類人士可獲優先接種。今早8時起,多間疫苗中心外已現人龍,中心指明只接受預約人士入場,亦不設即場輪候名額。不少人士都指是為日後可以「返大陸」而前來接種,亦有人對國產疫苗大表信心,直言「大陸嘢好吖嘛,而家全世界都係大陸嘢好㗎喇。」亦不擔心副作用,揚言「咁多人打咗,咁多人死都死到你自己,咁就抵死啦!」

政府早前宣佈,5類人士可獲優先接種科興疫苗,包括跨境口岸人員如機組人員、跨境司機;安老院舍及殘疾院舍工作人員;60歲以上人士等。屬於優先組別的市民,於本周二(23日)起已可透過網上預約接種。政府日前表示,在登記開始的首9小時,已有4.2萬人登記接種。

除了18個提供疫苗接種的醫管局普通科門診,市民亦可到5間提供科興疫苗的社區疫苗中心接種,分別為中央圖書館、官涌體育館、九龍灣體育館、源禾路體育館,以及天暉路體育館。疫苗中心由早上8時開放至下午1時半,以及下午2時半至晚上8時。

多間疫苗中心未開門已有數十人排隊

《蘋果》今早到部份社區疫苗中心視察,其中中央圖書館於早上8時起,已有近30人排隊接種疫苗。位於佐敦官涌市政大廈的科興疫苗接種中心今早8時開門前亦一度有半百人到場排隊等打針。

市民進入中心前,需先掃描安心出行二維碼,有職員在門口檢查預約證明。中心亦有測溫器量度市民體溫。中心外張貼告示,提醒只允許已預約人士入場,亦沒有即場輪候的名額。

市民進入中心後,有職員派發疫苗的小冊子,隨後坐在有不同號碼牌的椅子上等候打針,每張椅子均有保持一定社交距離。各中心設有不同數量的「打針間」,中央圖書館則有11至15個。場內貼有標示,提醒市民不可飲食及攝錄。

接種人士由到場至離開可在一小時內完成程序,接種後獲發一張疫苗接種紀錄,上面寫有姓名、身份證號碼、第一針疫苗的名稱、接種日期及地址、第二針等資訊,另外有疫苗資訊宣傳單張和口罩。

官涌科興疫苗接種中心有家庭老中青三代到場,不過隊伍中大部份是長者。他們入場時需向職員展示預約紀錄,再獲分批放行上6樓接種中心打疫苗。

年近7旬的黎女士不擔心科興疫苗安全性,「唔擔心,有得打做乜唔打,想長多幾年命嘅話」,但她指好難預約,「等咗一個鐘,要新抱幫我㗎,唔係我唔識㗎!希望打咗(針)好啲」。

兒子為父預約後攜母一齊優先打針 對國產疫苗有信心

廚師劉先生則為屬於優先接種群組的7旬爸爸預約後,他和媽媽亦可優先接種。他對國產疫苗有信心,認為打完有抵抗力「好過唔打,(點睇科興數據僅五成有效?)數據有好多方面講法唔同,我哋冇所謂。」他指內地家人已全部接種國產疫苗,故不擔心副作用,希望打完針可以通關返大陸。

住深水埗的蘇女士因做義工常接觸長者,自己又是長者,因此想盡快打疫苗,她預約了後天打針,今日先來摸路,她認為電子預約對長者不太方便,亦指如果首輪接種可以涵蓋普通科門診所和私家醫生較好,長者不必舟車勞頓去離家較遠的市政大廈打針。

搶先打針為通關後可優先通行

梁先生今早準時到場,但最終接種時間比預約時間遲了10分鐘,形容首天安排略顯混亂,座位非按號碼順序排隊,「應該要按返時間嚟排隊」,打完針職員要求他等候半小時才離開。他指打完針無特別感覺,下次是四周後再接種第二針,他料開通「健康碼」時已接種人士會是優先通行群組。

長者大讚國產疫苗好:全世界都係大陸嘢好㗎喇

荃灣街坊張先生是長者優先接種群組,他表示接種程序順利,也不覺痛,一個月後打第二針,由入場到出來剛好一小時,被問為何打科興疫苗,他指「大陸嘢好吖嘛,而家全世界都係大陸嘢好㗎喇。」對於數據不足會否擔心副作用,「梗係唔擔心啦!咁多人打咗,咁多人都死到你自己,咁就抵死啦!」

7旬翁唔識網上預約想walk-in被拒嘆「唔知點算」

不過,有長者因不諳科技,未知如何預約接種疫苗,打算前來即場接種,惟被職員拒絕,只向他提供一份疫苗小冊子,著他致電24小時熱線求助。77歲的洪先生指,自己從電視新聞得知可前來中央圖書館打疫苗,「我話我等到你收工,有位再幫我打,佢都唔肯」,大嘆「咁點算,我而家都唔知點算」。

洪先生坦言自己渴望接種科興,「我都70幾歲喇,對自己好嘛,可以出行吓,特首都打啦」。他指,自己身邊沒有年輕人可幫忙預約,惟有試試致電小冊子的熱線,大嘆「梗係失望啦!(心情)梗係唔好啦」,認為網上預約並不夠體諒長者,「佢(職員)唔幫我預約呀,要去郵政局呀咁,咁點算,我而家都唔知點算」。

老婦為「快啲返大陸」想打科興 指BioNTech多副作用

67歲的曾女士亦到場向職員查詢預約方法。曾指,自己曾嘗試不同預約方法,包括到郵政局,「但係佢都無啲閒人,即係得閒嘅人理你,好多人排隊呀」,又曾嘗試致電熱線,「但係咁帶你『遊花園』」。

曾表示,自己希望接種科興疫苗,「想快啲返到大陸嘛!」,反而不會選擇德國BioNTech與復星合作的「復必泰」疫苗,「咁多副作用!」她指,職員告知過兩天將有新一輪名額可供預約,兒子因工作繁忙亦未能幫忙,因此現時仍然未能成功預約。

由沙田出來看醫生的8旬梁生帶同撐枴杖的梁太亦到官涌疫苗中心嘗試入場,他指早前兒子無法幫忙成功預約,今日特地路過中心看看能否獲酌情打針,本身希望接種後可通關返大陸,但他們最終因無預約被職員拒絕入場,被建議下次去郵政局再預約,「當然失望啦,嚟到一心想打到」,他指電子預約始終對長者不便,希望增加預約渠道。

社區疫苗接種中心於下午2時半重開,於下午2時許,陸續有市民到場等候中心開門,有近20人排隊。

77歲的蕭伯伯從上水專程遠道來到中央圖書館,打算即場尋求協助辦登記手續,同樣失望而回,「我唔係話即刻要打,只係想約個時間⋯⋯我盡咗能力,係政府問題啫」。對於聶德權指可到郵政局做登記,蕭指自己在開始登記的第二日已曾到郵局,但職員告知名額已滿,「明明有100萬劑,點解7萬個就咁快話滿?我都唔明香港政府」。

7旬翁撲空批政府尊重長者得個講字

蕭伯伯批評政府常聲稱「尊重長者」,但只屬空口講白話,「得個講字,根本就係返工等放工,等出糧,等退休」,認為政府應在各中心開設一條隊伍,予不諳科技的「老友記」登記。他指,沒有傾向想打哪一款疫苗,希望可接種後令自己安心,亦可在通關後回大陸與太太團聚,惟現時登記無門,「唔打囉,咪由得我惹晒畀其他人囉」。

眼科醫生鄭先生亦於下午前來打針,他指日常工作均接觸不少長者,加上自己坐擁多間診所,希望為員工做個榜樣,證明接種科興疫苗安全,「好多人都話等人打埋先,使乜等啫,第一,幾千萬人打咗,同埋個technology(技術)已經係好成熟嘅嘢嚟」。

對於為何會選擇科興疫苗,鄭指,自己研究過相關數據,認為科興副作用較低,反而對BioNTech「復必泰」沒有信心,「我都唔知mRNA長遠副作用係啲乜嘢,因為(技術)太過新喇」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner