西環集中營:預算案團結黃藍貧富 清一色劣評(季陶)

更新時間 (HKT): 2021.02.26 02:00
陳茂波

財政司司長陳茂波昨日公佈的財政預算案,相信是香港自回歸以來,劣評最多的預算,單看香港民意研究所公佈的即時民調,財政預算案支持率是自1998年以來最低已知。

有專業人士笑言,陳茂波「最叻」之處,「就係一次過將黃同藍,上、中、下三所有階層都辣着,真係冇邊個財爺做到」,有政界中人也笑言,建制對預算案「鬧就兇狠」,「立法會佢哋玩晒,今次又睇佢哋敢唔敢逼政府讓步,定又係最後都係唔理民意」。

建制「鬧就兇狠」 恐不敢反對

該專業人士笑言,以往財政預算案不是被批益中產、忽略基層,就是中產抱怨糖不及基層多,從未見過「基層又鬧政府見死不救,中產又鬧已凍薪減薪,仲要向佢哋開刀,呢樣嗰樣加稅」,連他的一些已「上岸」的朋友,也罵財政預算案累街坊,「呢啲人一早上晒上岸,個個都唔理政治炒下股投資,點知畀預算案搞到輸錢,其中一個話喺香港咁耐,未見過一份預算案搞到小股災,港交所連跌兩日,呢個陳茂波真巴閉」。

另一政界人士表示,陳茂波今次財政預算案明顯沒有理會民意,「連建制派嘅意見都唔理,你睇經民聯張華峰大鬧加印花稅罔顧佢業界生存空間,民建聯、工聯會鬧冇失業援助金,陳茂波都懶理,就知政府根本唔再介意份預算案有冇民意支持」。

該政界人士又笑言建制對預算案「鬧就兇狠」,但同時建制「身體又很誠實」,「最後咪又支持」。

不過,今次和以往不同,「以往立會有民主派,政府怕唔夠票,多多少少讓啲甜頭畀建制,𠵱家立法會建制玩晒,政府根本唔怕建制投反對票」,而今次不滿預算案民意,黃、藍陣營也有,「如果建制唔敢逼政府多多少少讓步,係咪連自己支持者嘅民意都唔理,最後都係撐政府?」

周一及周五刊出

季陶

一格照片,一個故事,Follow蘋果Instagram!
BannerBanner