隔牆有耳:公數遊埠開支2.46億 7倍增幅 
8萬旅津堅離地 3,430公僕等住飛(李八方)

更新時間 (HKT): 2021.02.26 02:00

手機用戶請按此放大圖表

前日公佈份預算案,財爺陳茂波叫市民睇餸食飯,所以即使失業率去到7%,政府都只係借貸畀市民、冇失業援助,又cut福利又加稅,但似乎「睇餸食飯」只適用於市民,政府對待自己人就唔使。預算案披露,獎勵資深公務員去旅行嘅「長期優良服務公費旅行獎勵計劃」開支,下年度將由今年嘅3,377萬勁升到2.46億。市民冇工開冇飯食,原來唔及資深公務員去旅行重要。

其實呢個計劃都有咗好多年,舊年喺計劃下去旅行嘅公務員人數,因為疫情關係得646位,同前年2019年嘅2,338人相比,跌咗好多,令相關開支都少咗。不過政府估算,今年嘅人數就會大幅升至3,430人,即係仲多過前年。

據本土研究社報道,資深公務員獲得嘅旅費津貼,一年最多有近8萬蚊,同預算案新推出嘅失業人士私人貸款額相若。同時,「公費旅行計劃經濟圈」早已出現,唔少旅行社仲有相關package,由歐洲巴爾幹半島、非洲撒哈拉沙漠、到新西蘭都有。

香港社會就係咁,令八方想起「朱門酒肉臭,路有凍死骨」呢句說話。不過飛唔飛到都係睇彩數,就係睇吓特區政府抗疫抗成點先。

李八方

一格照片,一個故事,Follow蘋果Instagram!
BannerBanner