隔牆有耳:官方認證 泰博倒插國旗也愛國(李八方)

更新時間 (HKT): 2021.03.01 02:00

政府宣佈修改宣誓條例,公佈愛國者標準,仲整咗個「負面清單」,其中講明玷污國旗國徽都被視為「不擁護、不效忠」,可以DQ議席,坊間都好擔心因曾經倒插國旗而被判侮辱國旗罪成嘅熱血公民立會議員鄭松泰會唔會被DQ呢?放心,愛黨愛到將習大大肖像放喺辦公室「自賞」嘅政制及內地事務局局長曾國衞,噚日親口認證泰博冇事,可以繼續出糧做議員!

「未依法認定不擁護不效忠」

曾國衞噚日出席商台節目《政經星期六》,被問到倒插國旗而被判侮辱國旗罪成嘅泰博有冇犯宣誓條例,曾國衞立即畀咗泰博同泰粉一個明確同權威嘅答案,澄清泰博當日行為只被法院裁定侮辱國旗,「未依法認定其不擁護、不效忠」,換言之泰博唔會喺新法例生效當日即時被宣告DQ,命運同袁嘉蔚、岑敖暉等人截然不同,可以保住立法會議席。

獲官方肯定咁大件事,點會冇人講?連登仔講笑泰博喜獲簽名認證「鄭松泰是愛國的」,又有人話泰博可以繼續做忠誠反對派,亦算官方樂見。連登經常有人討論有咩原因令你黃轉藍,唔知曾局長認證泰博唔使被DQ,究竟算係泰博「黃轉藍」、定曾局長「藍轉黃」呢?八方仲唔明嘅係,點解連倒插國旗,都可以擁護效忠國家?講到底,都係官方說了算。

李八方

一格照片,一個故事,Follow蘋果Instagram!
BannerBanner