初選大搜捕︱專訪︱再戴上耳環 劉凱文獲續保整裝到庭聲援47被捕民主派

更新時間 (HKT): 2021.03.01 15:51
劉凱文續保後戴回平日會戴的耳環及金絲眼鏡,今早9時到西九龍裁判法院旁聽初選搜捕案。

因參加前年衞生服務界民主派初選而被捕的註冊護士劉凱文,昨天穿上預備被拘押的裝束及戴上膠框眼鏡到警署報到,因為一旦被還押,便要除下所有飾物,連金屬框眼鏡也不能佩戴,故他做好最壞打算。得悉暫仍獲續保後即時返回入住的酒店,戴回平日會戴的耳環及金絲眼鏡,今早9時已到西九龍裁判法院旁聽初選搜捕案,希望港人能在不同崗位聲援每名民主派初選的參選人。

質疑檢控準則 提早報到心情極沉重

劉凱文在法院外接受《蘋果》訪問時指,至今對警方的檢控準則存在很多疑問,「而家政權個紅線去到邊?我哋真係充滿問號」。劉憶述昨日到警署報到期間心情極差及沉重:「因為《國安法》最恐怖嘅地方,係我哋嗰個控罪,最嚴重可以監禁3至10年,再加上好多唔明朗嘅地方,可能冇陪審團、有指定法官、被扣旅遊證件 。」

他指上周五收到警方要求提早報到的電話後,原預計會被起訴,昨日報到前已與同事預先告別並交帶工作,並指至今最放不下的是香港人,因為他在抗疫崗位,一直未有離開,希望能在公營醫療崗位為香港人發聲,「我都係因為想做呢啲嘢,所以至投身政治,想以唔同崗位服務香港」。

欲在醫療崗位為港人發聲

他稱,明白香港人在近年的社會運動中,會對香港逐漸流失希望,他個人亦有失望及沮喪的時候,「但我都留喺香港,希望以自己嘅身位、以個人微弱嘅力量,希望為香港嘅全民健康同醫療體制盡一分力。縱使我哋見到好黑暗,陰霾一路籠罩住我哋,政治氛圍已經步入冰點以下咁耐,我哋冇辦法唔沮喪,但我哋都係要對未來心存希望,香港人嘅未來一定要由香港人行返出嚟先得」。

問到在立法會選舉方式即將大變下,未來還會否再參選時,劉凱文稱目前最重要關心和聲援47名已被還押的民主派戰友,「其他嘅嘢都唔係呢個時間討論同關注嘅」,並指心情至今仍十分複雜和沉重。

記者 林俊謙

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner