英國直擊︱在港家人病危求助港府 入境、衞署互卸膊 區議員畢東尼:近半求助現情緒問題

更新時間 (HKT): 2021.03.01 00:02
目前在英國工作的Sonia,由於妹妹病重入院,心急如焚的她尋遍政府部門亦無任何有用的回應。 受訪者提供

焦急回港的,除了一批只打算短期停留在英國而被迫滯留在英的港人外,也有並沒打算回港、卻因家人病重而必須回去的人。目前在英國工作的Sonia,由於妹妹病重入院,心急如焚的她尋遍政府部門亦無任何有用的回應,最終只能靠自己的方法,先到其他國家停留21日,再回港隔離21日,加起來共42日才能探望危殆的家人。

部門互交波「話同我開file之後冇咗件事」

Sonia表示,二月初的時候,在英國工作的她突然接獲妹妹病重的消息,「佢本身都係健健康康、無乜大病,但突然之間5日之內就急轉直下,由行得走得到危殆需要搶救,令到我好急好突然要即刻返香港,本身係無返香港嘅planning」。

由於家人病情危殆,但亦知道香港對英國實施極為嚴謹的入境限制,故Sonia亦有尋找入境處及衞生署查詢,以了解她的個案是否可以酬情處理,「但兩個部門都話係對方負責,基本上我都知道係嘥氣,入境處淨係話同我開file,之後就冇咗件事」。

最終Sonia向因到英國探親而滯留當地、亦有份協助滯英港人的觀塘區議員畢東尼求助,獲得資訊後她便決定先行到別國停留21日,然後再回港。

對於政府部門的無視及不作為,Sonia直言感到無助及憤怒,「係香港政府先咁荒謬,唔畀自己嘅市民返屋企,入境處覆我淨係話勸大家呢段時間唔好返香港,完全無任何支援」。目前在別國停留的每一天,對於Sonia來說都異常煎熬,「因為我個妹情況係分分秒秒都變緊,佢依家仲喺ICU昏迷緊,好擔心,我依家係完全無嘢可以做到,touch wood佢聽日死咗我都無嘢可以做到」。

一直有份協助滯英港人的觀塘區議員畢東尼表示,自政府宣佈禁止英國航班抵港後,至今累積起來有超過300個滯留個案,當中不少個案目前已出現情緒問題,「收到好多求助個案,有130個係情緒出現問題,大家壓力都好大,有人打嚟真係會擔心到喊」。在畢東尼接觸到的求助個案中,不少都是來到英國探親的長者,「最年長嗰位係90歲嘅婆婆,佢好想返香港,自己啲藥都差唔多用完,但又唔係好識英語。又有啲係懷孕個案,唔能夠好似其他人咁經其他國家返香港,又有係癌症病患者,依家都返唔到去覆診」。

過去兩個月,畢東尼都有跟各個政府部門溝通,反映滯英港人的苦況,「由第一日到依家,我哋都希望政府有個時間表,不安嘅原因都係因為無時間表,我哋依家只能睇航空公司,依家最快嘅機係話三月尾先可以返香港,真係好失望」。

駐英記者李雨夢 英國報道

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新:iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner