隔牆有耳:SW變51 左報屈常秘戴獨罩(李八方)

更新時間 (HKT): 2021.03.02 02:00
■劉焱(左一)上周三出席財政預算案記招時,戴咗S、W字樣口罩,商標被左報解讀成5、1。

左報批鬥矛頭近期轉向高級政務官,繼啱啱升任食衞局常秘嘅劉利群被左報指控在任食環署長時,未有清拆連儂牆文宣後,再有人被翻舊賬。《文匯報》網站前日以〈常秘劉焱被揭戴「獨罩」〉為題「報道」,指財經事務及庫務局常任秘書長(庫務)劉焱上周三出席財政預算案記招時,疑似戴咗「5、1」字樣拼成嘅商標口罩,但其實製造商舊年已澄清商標同5、1無關,左報仲咁屈法,當中用意相當明顯。

劉焱嗰款口罩生產商係「Savewo救世」,佢哋去年12月喺facebook發文,話商標取自英文S、W,當中冇5、1,鬧人移花接木解讀文字。睇返個字樣係將個品牌S字頭,扭成兩個等邊三角形,再喺右下角加斜線變成S、W兩個英文字。劉焱透過財庫局回覆,話事前未留意口罩牌子,亦唔知有人認為有咁嘅含意,否則一定唔會購買或使用。

口罩商疑改商標避禍

其實月初港鐵召開記者會公佈東鐵入錯線獨立調查報告時,行政總裁金澤培都因為戴咗上述口罩,被藍絲質疑支持「五大訴求,缺一不可」;有傳媒當時報道,話金澤培某日行過一間大型連鎖店,佢見made in HK、冇留意罩上有乜字樣就買咗,冇諗到會被無限解讀。

劉焱被批鬥之日,涉事口罩商救世喺fb宣佈,為咗「慶祝成立一周年」,即日起全面用新商標「SAVEWO LOGO:EVOLUTION」,話秉承佢哋嘅成立目的而不斷進化,而舊有商標都會繼續用,似乎都係想避免再捲入批鬥潮。

李八方

一格照片,一個故事,Follow蘋果Instagram!
BannerBanner