隔牆有耳:狙擊民主派cap上cap 
689、陳雲真connect(李八方)

更新時間 (HKT): 2021.03.02 02:00
■梁振英cap完「陳雲之言」,輪到陳雲cap上cap再分享出去。

「國師」陳雲同「國家領導人級鍵盤戰士」梁振英,到底有咩政治理念互相認同,又互相分享呢?原來就係狙擊民主派同抗爭派喇。47名民主派參與立法會泛民初選人士被控莫須有罪名,親者痛仇者快,藍絲界打手梁振英撲出狂踩並不出奇,奇就奇在居然分享「國師」陳雲一段留言,加持一句「陳雲之言」。

呢段「陳雲之言」,似乎係國師早前寫下,無標上日期,內容係話自己一早就知「戰敗之後是要做戰俘的」,2019年佢叫人唔好出嚟,唔好叫港獨口號亦唔好唱港獨歌,國師好似有水晶球一樣,斷言「戰敗,是必然的,也必然要及早預備的」。喺梁振英分享完後短短幾個鐘,國師cap上cap將梁振英嘅喜悅再分享出去,仲再加多腳「香港人一直漠視現實政治,故此在2019年慘敗」。

花式跳船後再出發

八方喺度提一提讀者,陳雲早喺國安法實施後,高調宣佈退出社運,仲俾網民形容咁樣唔係落船,係花式跳船。再出發嘅陳雲今次得到國家領導人認證,似乎可以安心出行,前晚突然有個「香港市民黨」fb專頁出現,仲介紹自己「是一眾年輕香港人會同陳雲先生創立的政黨」,劈頭首句聲明主張貫徹《基本法》及一國兩制,有人留言「忠君愛國的忠誠反對派,必定支持!

李八方

一格照片,一個故事,Follow蘋果Instagram!
BannerBanner