47民主派提堂︱市民攜兩女首到法院聲援:唔知等乜嘢㗎,但我就係想等,希望佢哋平安出嚟!

更新時間 (HKT): 2021.03.02 22:51

毫不人道的馬拉松式審訊,未磨滅庭外聲援人士的意志;周二(2日)西九龍裁判法院外雖然未見首日逼爆情況,卻仍有不少黑衣有心人,默默為因初選被控《國安法》的民主派人士打氣,當中不少人是首次到法院聲援,希望對相識的民主派議員給予支持。

首聲援市民︰擔心得咁多咩?人哋犧牲咗下半生幫我哋啦!

不便上鏡的王小姐今午特別帶同7歲和2歲女兒到西九法院外聲援:「因為我過唔到自己嗰關,成日個心喇住喇住,咪等埋佢哋放學一齊嚟囉」。知道首天法院一定逼爆,她特意在翌日審訊才再到場,原因之一也包括「金鐘高等法院(佔中案上訴案)嗰度分咗啲人(聲援)」,故決定首次到法院聲援民主派。

佔中運動期間,她認識了47名被捕民主派之一的東區區議員徐子見,並不時向徐求助,「我好擔心佢(徐),不過(我)又做唔到嘢,惟有喺度睇囉!」她直指:「我唔知等乜嘢㗎,但係我就係想等,有一個願望,就係佢(哋)平安出返嚟」。她不諱言面對在場大批警察駐守監視,也會擔心自己和小朋友的安全,「但你擔心得咁多咩?人哋都犧牲咗下半生嚟幫我哋啦!」

兩子之父︰香港人好命硬嘅,真係要鬥長命

另一位到場聲援的何先生曾擔任「送車師」,今午與6歲和8歲兒子短暫到西九法院外,希望聲援認識多年的荃灣區議員譚凱邦及灣仔區議員楊雪盈,「因為我又要照顧佢哋(兒子),但我哋又好想支持我哋識嘅人,有幾個都喺(法庭)入面」。他指在香港當前政局下,「我相信香港人好命硬嘅,要頂住,真係要鬥長命,而家政府根本亂嚟㗎嘞」,並認為港人現時可做的「就係行出嚟(聲援)」。

手持標語抗議審判不公

巿民林小姐昨在西九法院門外聲援民主派12小時後,今日再手持「坐在高高在上法庭內法官/裁判官的審判是否公平公正?是否還值得香港人的信任?」標語留守法院外,她對警方濫捕十分憤怒,質疑政府以《國安法》控告參加初選人士並無任何理據,「你(政府)個道理喺邊度?我哋識嘅法律唔係咁㗎!」

她批評政府做法毫不尊重前年參加初選投票的60多萬香港人,「你(政府)成日賴落人哋嗰度,話人哋點樣煽動煽動,你當我哋啲巿民冇腦㗎?你政府冇腦,唔代表我冇腦㗎!」

有份參與初選並被捕、但早前被獲准保釋的民主黨前立法會議員鄺俊宇、天主教香港教區榮休主教陳日君,以及社民連主席黃浩銘亦有到西九龍裁判法院旁聽室,旁聽聆訊進行。

晚上10時,律師伍展邦與壹傳媒創辦人黎智英女兒離開西九龍裁判法院;至10時半,總裁判官蘇惠德宣佈休庭,明日中午12時繼續聆訊。至近11時,大批「旁聽師」陸續離開,天主教香港教區榮休主教陳日君、工黨李卓人與陳皓桓亦離開法院。

藝人黃耀明為被告何桂藍之擔保人。散庭後,黃耀明被傳媒問到為何成為其擔保人,他指不願透露細節,「我暫時唔可以講住,總之我今日嚟係支持同路人、聲援同路人」。黃寄語香港人堅持下去,「法律制度我哋一定要保守住,無論係從事法律嘅人,定係香港市民」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner