李八方online︱灣仔區議員防疫膠板扮探監 民主派陳鈺琳嬲到喊

更新時間 (HKT): 2021.03.03 11:12

有啲笑,唔可以亂講!唔計警方起訴47個組織或參與民主派人士,過去呢一、兩年唔少港人因為爭取香港民主自由被囚,失去人身自由;噚日灣仔區議會開會之時,灣仔區議員、自由黨林偉文就將防疫膠板當探監玻璃板,仲叫啲民主派區議員嚟探吓監,而竟然有民主派區議員搭訕,民主派區議員陳鈺琳喺Facebook上載呢段片段,留言:「看在眼內我就真係笑唔出,仲嬲到喊」。

灣仔區議會噚日召開撥款及常務委員會,休會期間,林偉文返緊埋座位嗰陣,突然上演「監獄風雲」,隔住防疫膠板問候坐喺對面位嘅兩位民主派議員張嘉莉同李永財:「點呀?呢排身體點?」;張嘉莉笑住話同屬建制派嘅區議員謝偉俊走咗嘞,叫林:「諮詢吓律師啲意見先啦」,但此舉無阻林偉文「表演慾」,追問「嗰單嘢搞成點?」,又叫佢哋記得嚟探監,李永財就忍唔住答嘴:「OK!探緊。」

相信唔少人睇完條片,一啲都唔覺得好笑,只係覺得好可悲;有網民亦留言叫陳鈺琳唔好嬲,「大家層次唔同」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner