隔牆有耳:DO化身DOJ 表忠怪邏輯
「黃大仙標語影響西九審訊」(李八方)

更新時間 (HKT): 2021.03.03 02:00
■劉珈汶喺座位貼出「停止政治逼害,釋放四十七人」標語,DO黃智華(圓圖)以影響西九龍審訊為由要求拆下。

左報日日煽起批鬥風,連政務官都不忘鬥爭,希望有朝宣誓時獲愛國認證,唔會因違誓而DQ。噚日黃大仙區議會開大會,公民黨劉珈汶喺座位貼出「停止政治逼害,釋放四十七人」標語,民政專員﹙DO﹚黃智華話標語會影響西九龍法院申請保釋嘅審訊。黃大仙嘅標語影響西九龍審訊?政圈中人揶揄,咁夏寶龍點名叫重判戴耀廷、黃之鋒、肥佬黎又點計?係咪寸夏主任先?

政圈揶揄暗寸夏寶龍

其實劉珈汶冇用揚聲器發表政治論述,只係靜靜貼出標語,全文係「欲加之罪,何患無辭」、「磊落做人,一生平安」及「停止政治逼害,釋放四十七人」,黃智華立即DOJ(律政司)上身,聲稱有關標語或影響相關案件審訊,仲話字眼或違反國安法。劉珈汶質疑黃有意向京表忠,驚俾左派狙擊,佢最終應要求拆下標語,但追問黃點解聲援被捕者都違反國安法?邊個字眼影響判決?黃智華嗰刻變返DO,用返慣用技:拉隊離場。難怪劉珈汶嘲笑「DO(民政專員)化身DOJ」,仲喺fb加咗hashtag「#單憑我一人之力遠在黃大仙又如何影響西九嘅trial」。

黃智華出任黃大仙區民政專員前,曾擔任政制及內地事務局助理秘書長,政圈中人揶揄,熟悉國情嘅DO一定有睇《紫荊》日前刊登港澳辦主任夏寶龍講話全文,夏要求嚴懲當日提堂嘅戴耀廷、黃之鋒,仲有被扣押嘅黎智英,黃智華指區議員掛標語影響審訊,唔通指桑罵槐、暗踩夏寶龍影響審訊?

李八方

一格照片,一個故事,Follow蘋果Instagram!
BannerBanner