隔牆有耳:《大公報》插民動 認錯羅健熙係外國勢力(李八方)

更新時間 (HKT): 2021.03.03 02:00
■《大公報》在圖片中標註羅健熙為美國國際民主研究所(NDI)主管薛德敖。

左報嘅幻想同創作,真係會嚇人一跳。中共喉舌《大公報》噚日刊登一篇有關早前已宣佈解散嘅「民主動力」報道,主要都係質疑民動收美國資金,仲炒冷飯登2018年民動周年大會嘅相片,細心一睇,標註為與會者之一嘅美國國際事務民主協會(NDI)亞洲項目主任薛德敖,其實係當時仲未係民主黨主席嘅羅健熙,唔知有心定無意點錯相。

羅:不愧係公信力最低報紙

噚日《大公報》A4版以顯著篇幅報道民主動力長期「勾結」外國勢力,包括收美國資金,證據之一係2018年11月嘅民動周年大會上,「美國國際事務民主協會亞洲項目主任薛德敖」都有出席,指薛德敖當時同在席嘅鄭宇碩、蔡耀昌等人「一致舉手通過動議」。但明明嗰位人兄係羅健熙喎!咁究竟係真點錯相,定借機想老屈民動同羅健熙呢?

羅健熙回覆八方時無奈指:「《大公》不愧係公信力最低報紙。」仲引述中大2019年發佈嘅「市民對傳媒公信力的評分」,指該份調查正正指出《大公報》、《文匯報》喺收費報章入面,穩守包尾兩席。

李八方

一格照片,一個故事,Follow蘋果Instagram!
BannerBanner